Ba suba donkti sopsop ka Sorkar bad ki karkhana dewbilat rai ka HC ban pynïar ïa ka jingtohkit

Shillong, Risaw 30 : Ka ïing Bishar High Court jongka jylla mynta ka Lah Sngi U Blei ka la ai ka jingmynjur ban pynïar ïa ka jingtohkit halor ka jingsuba ïa donkti sopsop hapdeng ka Sorkar jylla bad ki karkhana dewbilat kiba don ha East Jaintia Hills District.
ïa kane ka hukum la pynmih hadien ba u nongmudui jong ka PIL Shailendra Kumar Sharma, uba kam ïalade kum ki riew ieit paidbah bad uba la kren ïa shibun ki kam ba ïadei bad ka mariang, ula wanrah ïa ki jingshisha kiba buh jingma haba ïadei bad ka jingtreikam jong ki karkhana dewbilat ha East Jaintia Hills District.
“U Nongmudui ula kyrpad ban pynïar ïa ka jingtohkit, kynthup ïa ka jingsuba donkti hapdeng ka Sorkar Jylla bad ki 7 tylli ki kompani dewbilat kiba long mamla, yn sa mynjur ha ka sien shong bishar ban wan. Buh ïa kane ka mukotduma ban bishar biang ha ka 7 tarik Naiwieng, 2023” ong ka ïing bishar ba kynthup ïa u Chief Justice Sanjib Banerjee bad Justice B Bhattacharjee ha ka hukum.
Kat kum ka jingong une u nongmudui, ki 7 tylli ki kompani ki la ïoh ïa ka jingbit na ka Sorkar Jylla ban pyntreikam ïa ki karkhana dewbilat ha ryngkat bad ka power plant ba 10 mw hynrei kine ki karkhana ki la pynmih kham palat ïa ka dewbilat ban ïa kaei kaba la buh da ka Sorkar ha ka shithi ai jingmynjur ba 13 tarik Naiwieng, 2008.
Une u Nongmudui ula kam ba ki kam tih marpoh khyndew haba ïadei bad u mawshun ka dei kaba la leh da kine ki 7 tylli ki kompani khlem da ïoh ïa kano kano ka licence ne ka jingbit.
Ka hukum ka ong ba halor kane ka mat, u nongmudui ula pynsngew ïa ki jingkylli kiba la buh da ka Ministry of Mines ha ka 2 tarik Lber, 2022 bad kam ba ka jubab jong ki 7 tylli ki kompani ïa kine ki jingkylli kim shym la pynpaw satia ba ki la ïoh ïa kano kano ka licence ban tih mawshun.
Ka Iingkashari kala bthah ban pyntip ïa baroh ki nongshah mudui kynthup ki 7 tylli ki kompani ba kane ka mukotduma kan sa don biang hadien shitaiew na ka bynta ban jubab ïa ki jingkylli ba la rah da une u nongmudui.