Rai ban pynneh ïa ka jingïadei para nongñiah kali Tourist na Jylla Assam bad Meghalaya

Nongpoh, Naitung 30: Ki Nongñiah na Assam bad Meghalaya mynta ka sngi ki la pynlong ïa ka jongïakynduh lang ha Green Hills Nongpoh na ka bynta ban ïa kren halor ka jingjia kaba la jia ha ka 26 Tarik u Naitung 2024, ba ka kynhun Seng HNYF ki la khang ïa ki Kali kiba wan na ka jylla Assam ha Umtyngngar, East Khasi Hills Shillong.
Na katei ka jingjia ha Umtyngngar ka la wan rah ka kynrum ka kynram hapdeng ki Nongñiah na Meghalaya bad Assam kiba im jakpoh na ka kam kamai kali da kaba kit ïa ki nongleit nongwan. Kum shi bynta ban pynthynda na ki jingsyier hapdeng ki nongñiah na Assam bad na Meghalaya na katei ka jingjia ki la pynlong ïa kane ka jongïakynduh lang na ka bynta ban ïa kren pynbiet bad ban ïa phylliew jingmut ban pynneh ïa ka shongsuk shongsain bad ba ki nongñiah na Assam ne Meghalaya kim dei ban shah ktah ha ka leit ka wan.
Ha kane ka jingïakynduh lang ki nongñiah na Meghalaya bad na Assam mynta ka sngi, ka la don ka jingïatai kaba jur hapdeng ki para nongñiah, kaba dei na katei ka jingjia ha Umgtyng-ngar, ha kaba kane ka la ktah ïa ka shongsuk shongsain ki para driver bad wat ki nongwan jngoh pyrthei la ka long na Assam bad na Meghalaya.
Kumba la pynpaw da ki nongïalam hadien ka jingïakynduh lang, u Robin Dutta President ka Greater Guwahati Tourist Taxi Association Paltan Bazar bad u Bah Tiplang Nongbet President ka Hynniewtrep Tourist Taxi Association ki la ong ba ka rai kaba ki la shim na kane ka jingïakynduh lang ka long ban pynneh ïa ka jingïadei bad ruh ba la rai ban ïa trei lang khlem kano kano ka jingpynthud la ka long na Meghalaya ne na Assam.
Ki la pynshai ruh ba ka jingjia ha Umtyngngar kam dei kaba la leh da ki dirbar bad ka dei kaba la leh da ka kynhun seng bhalang bad kum ki nongñiah na Meghalaya ne Assam kim don jingtip satia ïa katei ka jingjia ba ka seng HNYF ki khang ïa ki Kali ba wan na Assam bad ai ba ka sorkar kan leh ïa kaba donkam katkum ki lynti jong ka ain.
Shuh shuh, kitei ki nongïalam ki la pyntip ruh ba ka rai kaba hakhmat eh kaba ki la shim rai mynta ka sngi ka kynthup ruh ban pynneh ïa ka shongsuk shongsain bad ka jingïadei para driver la ka long na jylla Assam ne jylla Meghalaya ha ka leit ka wan ban kamai jakpoh jong ki.
Ki la pynpaw ruh tang kawei ka jingeh ba kum ki nongñiah na Assam ne Meghalaya ki ïa kynduh ka dei ka jingbun palat ki kali kamai ki riew shimet kiba kit ïa ki nongleit nognwan ba kum ki nongñiah lyngba ka kynhun jongki, kin sa shim khia ban khang noh bad ruh ban pyntip shabaroh ar sorkar kata ka sorkar Meghalaya bad Assam ba kin khang ïa kine ki kali riew shimet ba wan kamai beain ha Meghalaya bad ha Assam.