Nongpoh, Risaw 20: Hadien ka jingïaid shaphrang jong ka lympung ïalehkai Third Division Ri-Bhoi League 2024 bala pynlong da ka Ri-Bhoi District Sports Association katei ka lympung kala poi noh sha kaba kut ha ka sngi Saitjaiñ haka jingïakhun phainal kaba la long hapdeng ka Mawlyngkhung SC pyrshah ïa ka Mawlyndep SC ha madan ïalehkai ka shnong Nongjri.
Kane ka jingïakhun phainal kaba la long mynta ka sngi kala pynshongshit ïa kiba bun ki nongpeit kiba la wan ban sakhi ha katei ka sngi namar baroh ar kynhun ki dei kiba khlaiñ kaba la pynhun ruh ïaki paidbah nongpeitkai.
Haba phai sha ka jingïakhun phainal mynta ka sngi, naduh ka sdang ka kylla step ki rangïalehkai na baroh ar kynhun kila trei shitom hynrei hadien katto katne por naka jingbakla u nongap kol ka Mawlyngkhung SC, naka liang u referee u la ai syndon da ka penalty sha ka kynhun Mawlyndep SC bad haduh ba kut ka kylla step ka jingïakhun kala kut da 1-0 kol.
Katba haka kylla miet ka jingïakhun kala nang shongshit shuh shuh ryngkat ka jingrisa ki paidbah nongpeitkai, bad hapdeng ka jingïakhun kaba jur ka Mawlyngkhung SC kala ioh ban pynphai ïa katei ka shi kol lyngba ka free kick bad haduh ba kut ka kylla miet ka jingïakhun kala kut noh hapdeng ka jingïakhaid da 1-1 kol.
Hadien katei ka jingïakhaid naka liang ki bor pynïaid kila rai ban pynïashut noh da ka tie breaker bad dei ha katei ka jingïashut tie breaker ka Mawlyngkhung kala lah ban pynliem noh ïaka Mawlyndep SC da 4-2 kol ban rah syndon ïaka nam lahduh jong katei ka lympung.
Katba haka liang ki kynthei ka Narympei Football Academy kala lah ban pynliem noh ïaka Pahamsyiem da 2-0 kol.
Ïa katei ka phainal jong katei ka lympung la wan ruh ban sakhi da u Bah Charles Marngar MLA/MDC ka Mawhati kum u kongsan bad u Raja Brahma ADC ka Ri-Bhoi kum u symbud kongsan haka jingdonlang ki nongïalam ka RBDSA, bad kiwei kiwei ki riew rangbah.
Naka liang ki bor pynïaid kila sam ruh ïaki khusnam sha ki nongjop bad kumjuh ruh sha kiba rem da ka trophy bad ka song pisa ryngkat kiwei kiwei ki khusnam shimet.
