Shillong, Risaw 20: Ka Nongkrem SC ka la lah ban pynthikna ïalade ban jam sha ka wat ïakhun ba khadduh ha ka lympung phutbol Second Division 2024 jong ka Shillong Sports Association hadien ba ka la jop ïa ka jingïakhun semifinal kaba la long ha ka sngi Saitjaiñ (19 tarik Risaw) ha SSA Ground, Polo-Shillong.
Ha kane ka sngi, la sakhi ïa ka jingtrei shitom jong ka Nongkrem, kaba la hap ban durut tyngeh naba ka la shah lamkhmat shi kol tang mar ïa sdang ka kylla step bad ban jop da 3-2 kol.
Ka Laitkyrhong SC ka la ïoh ban pynkhihjar nyngkong lyngba u Shngainlang Surong (6 minit) hynrei ka jingtrei shitom jong ka Nongkrem ka la ïoh noh ban pynïakhaid ha ka 14 minit lyngba ka kol na u Zothanpuia Bawihtlung.
Ha ka khyllipmat shuwa ban kut artad ka minit pynjlan jong ka kylla step, u Wilbert Marbaniang (45’+3 minit) u la buh hakhmat ïa ka Nongkrem da kaba pynkhih ïa ka kol kaba ar.
Katei ka kol ka la ïeng skhem tad haduh da jam sha ki minit pynjlan jong ka por ha ka kylla miet ba ka Laitkyrhong ka la ïoh ïa ka penalty bad la shimti da u Samuel Suting (90’+1 minit) u ba khlem pynsepei ïa kane ka kabu bad pynïakhaid biang ïa ka jingïakhun.
Hadien kane, baroh baroh ki la khmihlynti ba kane ka jingïakhun kan jam sha ka extra time hynrei kam shym la long satia kumba la khmihlynti, ha kaba u Donkupar Kharmyndai (90’+6 minit) u la khyrwit ïa ka namtam ban pynjop ïa ka Nongkrem bad kaba la pynkmen ïa ki nongkyrshan jong ka kynhun.
Lah ban kdew ba ka Nongkrem ka la ïohrung sha ka semi final hadien ba lam nakhmat ha ka Group B, katba ka Laitkyrhong kadei ka kynhun kyrdan ba ar na ka Group A.
Kumta ka jingïakhun na bynta ka namlahduh ha kane ka kyrdan kan long hapdeng ka Meghalaya Police FT bad ka Nongkrem SC. Lah ban kdew ruh ba baroh ar tylli ki kynhun ba rung sha ka final ki la pynthikna ïalade ban shah kyntiew kyrdan First Division ha ka samoi ban wan.
