Rah ka Them Rangskhen ïa ka nam lahduh jong ka 1st Sohïong Constituency Knock-Out FT 2022

Shillong, Risaw 07 : Ka Them Rangskhen ka la ïoh ban rah nam lahduh napdeng ki 16 tylli ki team kiba la wan ban ïashim bynta jong ka lympung ïalehkai phutbol kaba la tip kum k 1st Sohïong Constituency Knock-out Football Tournament 2022 ba la pynlong da u Bah Stodingstar Thabah, President ka TMC Sohïong Block uba dei ruh ha ka juh ka por u kyrtong u ban mih ban ïakhun ïa ka election MLA ha u snem 2023 na ka party TMC.
Ka Them Rangskhen kala ïoh rah ïa ka nam lahduh da kaba pynliem ïa ka Dengthring da 1-0 ha ka jingïalehkai phainal kaba la pynlong ha Madan Phudmardong, Rangskhen ha ka 1 tarik u Risaw 2022 bad da kane ka jingjop ka Them Rangskhen kala ïoh rah ïa ka song pisa kaba long 30 hajar tyngka ryngkat ka trophy katba ka Dengthring kaba la wan ba ar ka la ïoh khur ïa ka song pisa kaba long 15 hajar ryngkat ka Trophy.
Ha kane ka sngi la wan ban ïadon ryngkat lang da u Vice President ka Meghalaya Pradesh Trinamool Committee u Bah James S Lyngdoh uba la long kum u kongsan, ha ryngkat ka jingsakhi lang ki nongkitkam ka party, ki riew rangbah, longkmie longkpa, ki samla shynrang bad kynthei haduh ki hep kiba rit.