Noh synñiang u MLA ïa kiba leit ïakhun kti sha Turkey

Shillong, Risaw 07 : U MLA ka Mawlai Konstitwensi u Bah Process T Sawkmie ha ka sngi Thohdieng ka 07 tarik u Risaw, 2022 u la kner ïa la ki kti ban nohsynñiang da ka song pisa sha ki arngut ki nongïakhun kti, u Mainbor Khyriem bad u Banshanlang Terang na ka bynta ka jingleit jong ki ban ïakhun kti (Arm Wrestling) sha Turkey.
Katkum u Mainbor, uba long ruh u general secretary ka Meghalaya Arm Wrestling u ïathuh ba kane ka lympung ïakhun kti kan sdang ha ka 14 tarik mynta u bnai Risaw.
U la ai khublei ïa u MLA halor kane ka jingnoh synñiang jong u bad u la ïathuh ba mar ïaphone sha u MLA u la shim ia ka phone bad u la kular ban ïarap ïa ki bad kane ka la ai mynsiem bha ïa ki.
U ïathuh ruh ba ka sports department ka la mang 25 lak na ka bynta kane ka jingleit jong ki, kiba don kumba 11 ngut eiei. Hynrei namar ka jingleit ka la jngai bad kim dap, kumta ki la phai khmat sha u MLA, ïathuh u Mainbor.
Haba ïadei bad kane ka jingleit jong ki, u Bah PT Sawkmie u la kitbok bad kyrkhu kyrdoh ba kin ïoh khur ïa ka jingjop ban wanrah nam bad burom ïa ka jylla, kumjuh ïa ka ri India hi baroh kawei.
U MLA u la ai khublei ruh ïa ka sport department khamtam ïa u Bah Banteidor Lyngdoh, myntri ba khmih ïa ka sport uba la mang 25 lak na ka bynta ka jingleit jong kine ki samla ïakhun kti, kiba don baroh kumba 11 ngut.
U pynshlur ruh ïa kiwei ki nongïalehkai sport ba kin ym kut tang ha ka National level, hynrei ban mihkhmat ruh ïa ka International Level.
La ïoh ruh ïa ka jingkren na u Banshanlang uba la pynpaw lang ïa ka jingsngewnguh ia u MLA bad u la ong ruh ba nyngkong ki la don jingkyrmen, hynrei ki nongïalam jong ki ki ong ban ym don jingkyrmen bad u kyrpad ruh ban buh jingduwai khnang ba kin ïoh khur ïa ka jingjop ha kane ka lympung ïakhun kti.
Ha kane ka sngi la ïoh ruh ïa ka jingkren na bah Wanseng Jyrwa, samla Bhabok Lynser bad kiwei kiwei, kiba la kitbok lang ïa kine ki nongïakhun baroh arngut ba kin ïoh kheit ïa u soh jong ka jingjop.