Lahduh ka Rympei PIP ha ka ‘40 Above Veteran Knockout Football Tournament-2022′

Jowai, Risaw 07 : Ka lympung ïalehkai jong ki 40 snem shaneng ne ka ‘40 Above Veteran Knockout Football Tournament-2022′ bala pynïaid da ka West Jaiñtia District Sports Association (WJDSA) kaba poi noh sha kaba kut jong ka jingïakhun phainal mynta ka sngi ha madan Kiang Nangbah Stadium Dongmihsngi, Jowai ha kaba ka kynhun ïalehkai jong ka Rympei PIP FC kala long kum ka Lahduh.
Ïa kane ka lympung la pynïaid da ka West Jaiñtia District Sports Association (WJDSA) shi bynta na ka jingrakhe jubilee ksiar jong ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Ha kane ka sngi phainal u ma Chibor Najiar uba long Superintendeing Engineer (PHE) Rural Circle Shillong ula long kum u kongsan ha ka jingdonlang u District Sports Officer ma K. Passah, u Hony. General Secretary WJDSA ma Lammat-oo Laloo, ki nongïalam ba hakhmat ka WJHDS nalor kiwei de kiba la shah khot sngewbha.
Haba phai sha ka jingïakhun phainal hapdeng kine ki ar kynhun ka Rympei PIP FC pyrshah ïa ka Friends United kala long kaba ïakhait bha naduh kaba sdang tad haduh jong ka kylla miet, ha kaba ka kynhun Rympei PIP kala jop tang shikol bad ïa katei ka kol la thep lyngba u rangïalehkai jong ka u Marshal Kurkalang ha ka minit ba 42.
Hadien kane ka shikol na ka liang ka Friends United kala ïakhun dohïap ban pynphai kylla ïa ka shikol hynrei kam lad satia haduh ba kut, lyngba kane ka shikol ka kynhun jong ka Rympei PIP kala long syndon ka lahduh mynta ka snem.
Na ka liang ki bor pynïaid ïa kane ka lympung kila sam ruh ïa ka nam Man of the Match ha kane ka jingïakhun kaba la leit sha u Albert Shanpru jong ka Friends United. Na ka bynta ka kynhun kaba ïoh rah ïa ka nam lahduh kala ïoh ïa ka song pisa kaba T.30,000/- tyngka bad ka kynhun ba wan ba ar ka la ïoh T.20,000/- hajar tyngka.