Shillong, Risaw 07 : Ka kynhun ïalehkai cricket ka Meghalaya ka la mad nam rem ha kaba sdang jong ka lympung ïalehkai Vinoo Mankad Trophy, kaba dei ka jingïalehkai One Day jong ki kyrdan U-19 (boys), da kaba rem da hynñiew wicket ha ka Odisha ha ka jingïalehkai ha Pune.
Ka Meghalaya kaba la sdang tied nyngkong ka la kamai 43 ron ha ka jingkamai ron lang u Mrityunjay Bharali (21) bad Mrinal Das (13).
Ka jingshah pynhap wicket noh u Bharali uba dei u kapten kadei ka daw bah ba ka kynhun ka la duna ha ka jingkamai ron, hynrei watla katta ruh ka Meghalaya ka duh noh san wicket na bynta 14 ron.
Ka jingïalehkai ka la sdang biang ban ïoh mynsiem hadien ba u Shavian Blah (11), Banïalam Mylliemngap (13) bad khadduh wat ha ki 25 ron ba dang sah sa shi wicket, u Jeremiah L Kynshi (7 not out) bad Gavineal Marpna (9) ha kaba ka Meghalaya haduh kaba kut ka la kamai 104 ron duh noh baroh ki wicket ha ki 45.2 over.
Ha ka pali kawang bol, u Bharat Gurung (1/13) uba la ïoh pynhap wicket nyngkong bad u Raghav Magotra (1/36) ïa kaba baroh ar la ïoh ban pynhap wicket da ka jingïoh kem (catch out) da u Marpna, katba u rangtied ba lai ka Odisha u la shah pynhap wicket lyngba ka run out da u Mylliemngap.
Hynrei ka Meghalaya kam shym la lah ban pynhap ïa ki wicket ba shadien ka Odisha ha kaba ka la jop suk tang ha ki 21.3 over. Ka Meghalaya kan ïakhun pat pyrshah ïa ka Goa lashai ka sngi Saitjaiñ. Ka Goa kaba la dei ban ïalehkai pyrshah ïa ka Tripura hynne ka sngi hynrei la hap ban pynsangeh noh.
