Nongstoiñ, Jymmang 06: Ka kynhun ïalehkai Football jong ka Mawlarshong FC ka la khur ïa ka nam kum ka lahduh ha ka lympung Super Division jong ka Nongstoiñ District Sports Association 2025, hadien ba ka la lah ban pynliem ïa ka Pyndengrei SCSC da saw kol la ar lyngba ka tie breaker, ha ka phainal jong kane ka lympung mynta ka samoi kaba la long ha madan New Nongstoiñ ha ka sngi nyngkong.
Hapdeng ka jingïakhun ha ka madan kaba ktieh hadien ka jingjur slap, ki arliang ki la sei la ki buit ki bor katba don. Hynrei wat hadien ba kut noh ki 90 minit bad ba la pynïaleh ruh da ka extra time, ym shym la don ba thep kol. Kumta ki nongpynïaid ki la pynlong da ka tie breaker bad ka Mawlarshong FC ka la khur ïa ka nam lahduh.
Ha kane ka sngi, u bah Gabriel Wahlang MLA ka Nongstoiñ u la wan ban long kum u kongsan, ha ka jingïadonlang ruh u president ka MFA kata u bah Hamlet Dohling kum u symbud kongsan, u bah Y.G.Lyngdoh Working president ka Mawkyrwat District Sports Association, u MLA barim ka Nongstoiñ u bah Macmillan Byrsat, u bah B.S.Kharlor President ka NDSA, u bah Mt Gordon General Secretary ka NDSA, bah G.J.L.Sangriang dkhot jong ka Football Committee, bah C.P. Mawkon ADC West Khasi Hills, ki dkhot ka NDSA, ki nongïalam Shnong bad kiwei kiwei kiba la sam ruh ïa ki khusnam.
Mynta ka samoi ïa ka nam best Goalkeeper ha kane ka lympung NDSA Premier League la ïoh ban khur da u samla Teibok Lyngkhoi na ka Mawlarshong SC, best player sha u Rishan Khardewsaw na ka Nongstoiñ FT, top scorer la ïoh ban khur da u Silvester Thongni na ka Mawlarshong SC bad ïa ka nam Emerging player la ïoh ban khur da u Amosli Nongbri na ka Mawkawah SC.
Nalor ka trophy ka Mawlarshong Sport Club kum ka lahduh ka la ïoh ruh ïa ka song pisa kaba la kot sha ka shi lak tyngka bad ka Pyndengrei SCSC pat ka la ïoh 50 hajar tyngka.
