Rah ka Kharang SC ïa ka namlahduh jong ka SSA 4th Division Football League 2023

Kiew kyrdan ki saw kynhun ba poi semi final sha ka 3rd Division.

0

Shillong, Naiwieng 04: Ka kynhun ïalehkai phutbol jong ka Kharang SC ka la ïohrah ïa ka namlahduh ha ka kyrdan ïalehkai 4th Division jong ka SSA Football League 2023 hadien ba jop ha ka final lyngba ka tie breaker hynne ka Sngi Saitjaiñ ha madan 1st Ground SSA Stadium.
Ha kane ka sngi la ïadonryngkatlang u Eugeneson Lyngdoh President SSA lem bad ki dkhot nongkitkam ka Shillong Sports Association (SSA) lem bad u President ba dang shah jied shen jong ka Meghalaya Football Association (MFA) u Bah Hamletson Dohling, u ba la aiti ruh ïa ka Ambulance kaba la ai sngewbha sha katei ka synjuk ban pyndonkam lada jia ka mynsaw bad shitom ki rangïalehkai hapdeng ka jingïakhun.
Ka jingïakhun final ha katei ka sngi ka la long hapdeng ki ar kynhun kiba la dep kiew lypa sha ka kyrdan ïalehkai 3rd Division ha u snem ban wan, kata ka Kharang SC pyrshah ïa ka Iaityllilang SC.
Haba bishar ïa ka jingïalehkai ka la long kaba itynnat bad kaba shongshit naba baroh ar kynhun ki la pynpaw shisha ïa ka jingangnud ban ïohrah ïa ka namlahduh, hynrei kaba kut jong ka kylla step ym shym la don satia ba lah ban pynkhihjar.
Dei hadien ba la bteng biang ïa ka jingïakhun ha ka kylla miet ba ka Kharang SC lyngba u Laban Taro (55 minit) ka la ïoh ban lamkhmat ïa ka jingïakhun, hynrei kane kam shym la neh slem, ha kaba ka Iatyllilang SC ka la jubab da kaba pynïakhaid noh ha ka minit ba 59 minit lyngba u Bashaiphang Nongspung.
Haduh kaba kut jong ka por ym shym la don shuh ba lah ban pynkhihjar kaba la ïalam ïa kine ki ar kynhun sha ka extra time bad hangne ruh ym shym la don ba lah pynïakhlad ïa ka jingïakhaid bad ha kaba khadduh ka rai namjop ka la jam sha ka tie breaker.
Na ka Kharang SC baroh san ngut ki la lah ban pynrung, kiba kynthup ïa u F.Tariang, B.Khongjoh, J.kharsati, L.Taro bad u K.Marwein, katba ka Iatyllilang SC ka la rung tang saw ngut, kata u S.Kharumnuid, M.Kharmuti, N.Mawkhiew, I.Mynsong, kaba la pynlong ïa ka Kharang SC ban jop da 5-4 ha ka tie breaker bad ban rah syndon ïa ka namlahduh bad ïa ka khusnam sha katei ka lahduh la aiti da u Bah Hamletson Dohling u ba long kongsan ha kane ka sngi.
Nalor kane, ki saw kynhun kiba la poi shaduh ka semi final jong ka SSA 4th DIVISION Football League mynta u snem, kiba kynthup ïa ki ar kynhun ba ïakhun final ryngkat bad ar kynhun kiba la shahrem ha ka semi final, kata ka Lamlynti FC bad ka Mawkriah West SC ki dei ki kynhun kiba la shah kyntiew kyrdan sha ka lympung lehkai 3rd Division na bynta ka samoi ban wan.

Leave A Reply

Your email address will not be published.