Rah ka Dahakipaia Lyngdoh bad u Deibormitre Khonglah ïa ka nam Best Boxer
Shim bynta ki khynnah bad samla ha ka lympung ïakura ka WJBA ha Jowai
Jowai, Lber 25 : Ka West Jaiñtia Boxing Association (WJBA) mynta ka sngi saitjaiñ kala pynkut noh ïa ka lympung ïakura kaba la tip kum ka ‘All Jaiñtia Open Boxing Championship 2023’ ha ryngkat ka jingïatreilang bad ka ophis jong u District Sports Officer, West Jaiñtia Hills District ïa kaba la pynlong ar sngi lynter naduh hynnin ka sngi ha madan dai masi Ladthadlaboh, Jowai.
Na ka liang u bah F.B. Basan MCS ka West Jaiñtia Hills District ula wan ban pynhap pyrda ïa ka ha ka jingdonlang da u District Sports Association ka WJDSA u ma K. Passah, ki nongkitkam ka WJBA nalor kiwei de bad ki paidbah kiba la wan ban sakhi lang ïa kane ka jingïakop ïakura.
Ki nongïashim bynta kiba la wan sha kane ka lynpung ïakura kiba kynthup ïa ki shynrang bad kynthei na ki shnong bapher bapher napoh ka West bad East Jaiñtia Hills.
Na ka liang u bah Basan ha ka jingkren ula ai ka jingïaroh ïa West Jaiñtia Boxing Association (WJBA) kaba la pynlong kum kane ka lympung ïalehkai hapoh ka District bad kan long ruh shi bynta sei madan ïa ki sap ki phong jong ki khynnah bad samla kiba don ka mynsiem ïa kane ka jait jingïalehkai.
Shuh shuh ula ong na ka liang jong ka bor District ka don beit ha ryngkat bad kino kino ki Association kiba mih shakhmat ban pynkiew ïa ka kam ïalehkai Sports hapoh ka District hi baroh kawei. Ha ka juh ka por u ai ka jingkitbok kitrwiang ïa ki nongiashim bynta ba kin long kiba treishitom khang ba kin lah ban jop ha ka jingïaleh.
Ïa ki khusnam sha ki nongjop la sam da u kongkam jong kane ka sngi, ha ka liang ki kynthei ïa ka nam Best Boxer la ïoh da ka Dahakipaia Lyngdoh, ka nam Most Promising Boxer la ïoh da ka Heiniwanhi Nangbah, katba ha ka liang ki Shynrang Best Boxer la ïoh da u Deibormitre Khonglah bad ka nam Most Promising Boxer la jop da u Marleki Suchiang.
Ha kane ka lympung la pyniakhun ha ki kyrdan Sub-Junior: 30-32 kg, Junior: 35-37, 40-42, 45-47, 48-51 & 60+. Youth: 46-48, 49-52, 52-53.5, 54-57, Elight: 49-52, 52-56, 56-60, 60-64 bad ka Women 50-55
Kum ban shu pynkynmaw ïa kane ka ‘All Jaiñtia Open Boxing Championship 2023’ la wan ban plie pyrda ha ka sngi Thohdieng da u Superintend of Police (SP) ka West Jaiñtia Hills District u B.D. Marak (MPS).