Jowai, Lber 26 : Ki nongïalam ñiam hapoh ka Raij Jowai ba kynthup u Dolloi, Pator, Langdoh, Sangot, ki Wasan, ki Kñi iong ki Phra Kur Phra Kmai ryngkat ki Waheh Wasian ka Raij ha kane ka sngi Musiang 26 tarik Lber kila mih ban pyndep ïa ka Lehñiam Kmai Mooknor.
La ïathuh ïa kane ka lehñiam la leh naduh kipor mynshwa kaba dei ka lehñiam ba nyngkong ka Raij ha khmat ka ïaw ka Syiem kaba mut naduh kane ka sngi ki nongïalam ñiam ka Raij Jawai kila sdang ban pyndep ïa ki kam ñiam hapoh ka Raij ka shnong katkum ka dustur kaba la hikai da ki longshwa manshwa hashwa ban poi ki ‘Soo sngi Le ïaw’ jong ka Chad ñiam Behdeiñkhlam.
Ha ki sngi ba bud ki sarin kiba dei ki jinglehñiam ban pyndep da ki nongïalam ñiam ka Raij kynthup ïa ka Dih Soopen ha ïung Langdoh ha ka sngi (Thymblein) 29 tarik bad ka Kñia Thoh Langdoh kawei na ki lehñiam ban ai kñia bad ka nguh Blai Lyngdoh kaba hap ban pyndep ha ka sngi ba bud jong ka 30 tarik u Lber.
