Nongstoiñ, Jylliew 21 : Ka HYC Maweit Circle hynin ka sngi Maweit ha ka jingïadon lang ki dkhot ka HYC WKH, ka la leit ban ai Dorkhas ha u EE MePDCL WKH ha kaba ïa dei ban dawa ban pyntreikam noh ïa ka Sub-station kaba don ha Nongsba. Ka HYC Maweit circle ka la pynpaw ha khmat u sahep ba ka Sub-station kaba la ieng khongreng ha Nongsba ka khlem pat treikam haduh mynta.
Na ka liang u Samla Jeremiïa Dkhar President jong ka HYC Maweit circle ha ka jingïakren bad u sahep EE. MePDCL u la pynpaw ruh ïa ka jingduh light khah khah ha ka thaiñ.
Ki paidbah khamtam ki khynnah skul ka dong ka thaiñ ki la ïa lynga lut mynta, khamtam ba la sdang ka exam shiteng snem. Dei halor kane ka daw ba ka seng ka wan ban pynsngew ïa kane ka jingeh ban pyntreikam noh ïa kane ka Sub-station ha Nongsba. Ka seng ka la dawa ruh ban sdang pynieng noh ïa ki post light thymmai na Nongstoiñ shaduh ka Sub-station, namar ki post light barim kaba la don lypa kam lah ban kit ïa ka Sub-station. Hap ban ai da ka laiñ ne post light kaba thymmai bad kane haduh mynta ka khlem pat ïohi dak eiei ruh em naduh ba la dep shna ïa kane ka Sub-station.
