Shillong, Jylliew 21 : Ka PM POSHAN Scheme, kaba la tip mynshwa kum ka skhim bam ja sngi ki khynnah skul (Mid-Day Meal Scheme) kadei ka prokram ba ju ai bam ha ki skul, bad kadei ruh kaba bei tyngka da ka sorkar pdeng, kaba la pynwandur ruh ban pynioh ka bam kaba tei met ia ki khynnah skul ha ka ri baroh kawei.
Watla kane ka skhim ka pynbiang ia ki tiar bad baroh ki jingdonkam kum u nongshet na ka bynta uwei u khynnah ha ka shi sngi, ki kynnah ki lah ruh ban rah ia ki tiffin box ba thylli na la ki jong ki iing ki sem ha ka jaka ban sam ja ha ki pliang da ki skul.
Kane ka rukom pyndonkam da ki tiffin box, la jied da bun ki skul ha ka jylla Meghalaya, bad kane ka la long ka bynta kaba kongsan ha ka ban sam ia ka ja kaba hapoh ka PM POSHAN Scheme. Kane ka jingpyndonkam ka la long kaba kongsan ha ka ban pyntreikam ia kane ka skhim. Ki khynnah kiba dei ban ioh ia ka ja sngi PM POSHAN ki dei tang ban shu wanrah ia ki tiffin box ba thylli na la iing bad ban aiti sha u nongshet bad nongiarap mynstep bad kin leit pat sha la ki kamra klas manla ka sngi kumba ju long.
U ne ka nongshet bad nongiarap kin song ia ka bam ba la shet hapoh kine ki tiffin box hadien ba la pynkhreh. Hadien ba la dep song baroh ka bam na ka bynta ki khynnah skul, kumba la bthah da ka Sorkar Pdeng, kata ka dei 100 gram ki jingbam tei met na ka bynta ki Primary bad 150 grams ka jingbam na ka bynta ki Upper Primary manla uwei ne kawei ka khynnah skul ha ryngkat bad ki jhur, ki pulse bad kiwei ki jait jingbam katkum kaba don bad hadien ba la pyndep ia kane ki lah ban leit noh sha kiwei pat ki kam.
Ha ka por ba ki lait bam ja sngi, ki khynnah pule ki ioh ia ki tiffin box ba la song ka bam bad kin sa bam ia ka. Hadien kane kine ki tiffin ba la thylli kin hap biang sha la ki jong ki iing ki sem hadien ba la wai skul. Kane ka rukom treikam ka iarap ban pynduna ia ka jingdonkam ka um ban khlieng ia ki pliang, ka kyntiew ia ka jingleh khuid bad ka por kaba lyngkot ban ai bam.
Kane ka rukom ka pynthikna ruh ba ki khynnah skul kin ioh ia ka bam kumba la bthah bad ki kyndon ba la buh da ka Sorkar Pdeng. Ka DSEL ka pynshlur ia ki khynnah skul bad ki nongshong shnong ha kylleng ka jylla ba kin shim ia kane ka rukom leh kaba thymmai ka ban iarap ban kyntiew ia ka rukom treikam kane ka skhim ha ka rukom kaba biang.
