Shillong, Nohprah, 05: Ka Akhil Bharatiya Vidyarthi Parishad (ABVP) Meghalaya ha ka sngi Palei ka la pyntip paidbah ïa ki kam ba la leh ha 8th State Conference kaba la long dang shen ha ka 12 tarik, 13 tarik bad ha ka 14 tarik Naiwieng mynta u snem kaba la long ha U Soso Tham Auditorium, Shillong.
La plie ïa kane ka jingïalang bah da u Lat ka Jylla Meghalaya u C.H. Vijayashankar uba la long kum u Kongsan ryngkat ka jingdon lang jong u Myntri ka Sorkar Jylla u Bah A.L. Hek bad ki nongkren ha kane ka jingïalang ki long u National Vice President jong ka ABVP u Dr. Sudipta Mukhopadhyay ha kaba la ïashim bynta lang da ki riewpawkhmat ba kynthup ïa u Dr. Kestonbel Manik Syiemlieh, u Bah Hammarsing Kharmar, u State President jong ka ABVP Meghalaya u Dr. Sashankutlang Khongthorem, u State Secretary u Tengku M. Marak.
Haduh 500 ngut ki don ki nongïashim bynta ba kynthup ïa ki khlieh nongpynïaid jong ki shlem pule, ki Professor, ki nonghikai, ki nongsengsam, ki samla pule bad ki samla.
Ha kane ka jingïalang la pyni ïa ka jingriewspah ka kolshor ha ka jyla Meghalaya. La pynkut ïa kane ka jingïalang ha ka 14 tarik Naiwieng ha kaba la ïashim bynta ban ai jingkren da ki riewpawkhmat kiba la ïasam ïa ki jingtip bakordor sha ki samla bad sha ki nongmihkhmat ba la shah jied kyrpang.
Palat 200 ngut ki don ki nongïashim bynta ha ka rally pyni kolshor.
Ha ka jingïalang la pynithuh ruh ïa ki nongïalam ba la shah jied thymmai na ka bynta ka samoi treikam jong u snem 2024–2025.
Ka 70th National Conference ka la long ha Gorakhpur naduh ka 22 tarik haduh ka 24 tarik Naiwieng, 2024.
Ka ABVP ka la thaw rekod ban don ïa ki dkhot palat 55 lak ngut, kaba paw khmat eh kum ka kynhun ba bun tam eh ki dkhot hapoh ka ri India.
Ka thong jong ka State Conference ka long ban ïarap ïa ki para samla, ban pynneh pynsah ïa ka kolshor, ban kyntiew ïa ka bha ka miat jong ki para samla ka jylla Meghalaya ha ka pule ka puthi bad ka jingïadei parabriew.
