Pynthikna u VC ka NEHU ïa ki nonghikai ban pyndep noh ïa ka Career Advancement Scheme

Shillong, Lber 22: U Vice Chancellor (VC) ka North-Eastern Hill University (NEHU) u Prof PS Shukla, ula pynthikna ïa ki nonghikai jong ka skulbah ban pyndep noh ïa ka jingpynkhreh pura ïa ka Career Advancement Scheme (CAS) khnang ba yn ïoh ban pynïaid beit ïa ka jingkyntiew kyrdan ha ka kam hapoh jong ki katto katne bnai.
Ha ka jingkyrpad ka jong u Prof Shukla ula pynpaw ïa ka jingsngew burom bad u la ai khublei ïa baroh ki nonghikai jong ka skulbah halor ka jingtrei shitom ka jong ki ha ka ban noh synniang ïa ka skulbah NEHU.
“Phi long ki païa jong ka skulbah, kiba btin lynti ïa kiba dang samla ha ka jingmut jingpyrkhat bad ban pynwandur ïa ka lawei lyngba ka jingkitkhlieh ha ka kam hikai, jingwad bniah bad ka jingkiew irat ha ka pule puthi hapoh jong ka National Education Policy,” ula pynpaw.
Ula ong ba ka kynrum kynram kaba la mih ka la ktah jur bha baroh ki liang ïa ka skulbah bad u VC, “Nga tip bha ba kine ki la wanrah ïa ka jingpynslem ïa ki kam kiba kongsan khamtam ha kaba ïadei bad ka jingkyntiew kyrdan jong ka CAS. Haba nga la sdang ïa ki kam kiba ïadei bad ka CAS ha ka sien ka baar ha u snem 2024, ka jingthmu ka jong nga ka long ban pyndep ïa ka jingkyntiew kyrdan ha u Lber 2025, da kaba phaikhmat kyrpang na ka bynta kito kiba don ha ki kyrdan kiba heh ha ka kam shakri ka jong ki, khamtam eh na ka bynta kito ki ban sa shongthait noh na ka kam. Hynrei namar ka jingmih ki jingeh ki bym lah ban kiar ka la pynsahkut ïa ki kam ki jam baroh bad kane ka dang ïai bteng haduh mynta.”
“Nga sngewsih ïa ka jingpynslem bad nga kwah ban pynthikna ba ka jingpynkhreh kaba pura ïa ka CAS kadei ka mat kaba hakhmat eh. Nga shim ïa ka jingkitkhlieh kaba pura ban pyndep noh ïa kane ka kam kyntiew kyrdan hapoh ki katto katne bnai,” ula pynthikna ïa ki nonghikai bad da kaba ong, “Ka jingithuh bad ka jingai khusnam ïa ka jingtrei shitom, ka jingaiti bad ka jingnoh synniang jong ki nonghikai ha ka pule puthi ka long kaba kongsan bha bad nga ïengskhem ban pynthikna ba kito ki nonghikai kiba dei hok kin ïoh noh ïa ka jingithuh khlem kano kano ka jingpynslem shuh”.
Nalor ka CAS, u Prof Shukla ula pynpaw ba ki kynrum kynram kiba la mih ki la ktah jur ïa ki jingthmu jong ka NEHU ha ka jingai jingnang jingstad bad ka kam wad bniah.
Ula ong ba ka jingtrei suki ïa ki kam ki jam da ki bor kiba dei khmih, ka la wanrah ruh ïa ka jingsuki ha kaba ïadei bad ka jingshim ïa ki rai kiba kongsan kaba la ktah ïa ki samoi jong ka pule puthi bad ka la wanrah ruh ïa ka jingbym thikna ha ki samla pule ïa kaba 82% kidei kiba na Meghalaya.
Ula kyntu ïa ka jingdonkam ban pynneh biang ïa ka jinglong jingman ha ka skulbah. U Prof Shukla ula ong, “Kitei ki samla pule ki phai sha ngi ban ïoh ïa ka jingbtin lynti, ka jingneh ïa ka jinglong jingman bad ïa ka jingnang jingstad. Kadei ka jingbahkhlieh lang ka jong ngi ban ai ïa ki kaba bha tam ha baroh ki liang ha ka pule puthi ha ka skulbah. Ka skulbah ka kiew shaphrang, haba ki nonghikai, ki nongtrei bad ki bor pynïaid ki ïatreilang da kaba sngewthuh jingmut bad bud ïa ka rukom kaba dei ha ka jingai jinghikai”.
“Nga kyrpad ïa ka jingshemphang bad ka jingaiti ka jong phi baroh. To ngin ïatreilang ban pynneh ïa ka jinglong jingman bad ban pynleit jingmut ha ka thong kaba ngi ïa donlang, ban kiew ha ka pule puthi, ban ïoh jingithuh ki nonghikai bad ki samla pule kin long kiba seisoh. Ka jingseisoh jong ka NEHU kan shong ha ka jingïatylli bad ka jingdonlang ïa ka jingïohi jngai,” la kyntu u VC.
Ula pynthikna ruh da kaba ong, “Ki jingkhang ki jong nga ki long kiba plie kumba ju long. Nga don hangne ban sngap, ban ïatreilang bad ban kyrshan ïa iwei pa iwei ha ka ban pynurlong ïa ka kam jong ka pule puthi ka NEHU. To ngin ïajamlang shaphrang, ïatylli lang da kawei ka jingmut bad ban trei na ka bynta ban pynlong ïa ka NEHU kum ka jaka pule kaba baroh kin sngewsarong.”