Dawa ban pynphai biang noh ïa ka Block-I bad Block II sha Ri Lum Khasi Jaiñtia
Kynmaw ka HBDRF ïa ka 13 tarik Ïaïong kum ka sngi ba dum ngit
Jowai, Ïaïong 13: Ka Hynñiewtrep Border Dispute Redressal Forum- HBDRF haka jingïalang kaba lyngkot kaba long ha Jowai mynta ka sngi 13 tarik Iaïong kala pynkynmaw bad pynpaw ïaka ne ka sngi kum ka sngi jingsngewsih ne ka Black Day ban pynpaw ïaka jingpyrshah bad ka jingsngewsih ïaka jingpynhap jubor jong ka jylla Assam ïaka Elakai Labang Nangphyllut kaba tip kum ka Block- 1 bad ka Raij Nongtung Khyrwang kaba tip kum ka Block- 2 sha United Cachar & Mikirs Hills (Karbi Anglong Autonomous Council mynta) haka 13th April 1951 lyngba ka Notification TAD/R/31/50/149 -151 .
Ka Forum ka ong ba ka sorkar Assam kala leh ïakane khlem ka jingtip, ka jingmynjur jong ki paid nongshong shnong jong kine ki jaka, ki Khasi Pnar kiba dei ki trai ri trai muluk bad ka Sorkar Assam lyngba kata ka Boundary Commission kaba ka sorkar Assam kala thaw naka bynta ban pynkha ïaki District Councils haka jylla Assam ka la leh kyrkieh tang nalor meij (Table works) khlem da leit peit leit jurip bniah ïaki jaka puta, ki shnong ki thaw bad ki briew kiba shong basah haka bad haba pynmih ïakane ka Notification ka wanrah shibun bah ki kynrum kynram hakane ka thaiñ.
Hakaba kala khlad bad knieh jubor ïaki bynta jong ka Elaka Raliang Elaka Chiliangmyntang Elaka Nongjngi bad Elaka Nartiang bad pynhap pynïasoh jubor sha United Cachar & Mikirs Hills haka jaka ban pynskem bad pynneh pynsah hapoh United Khasi & Jaiñtia Hills.
Haoid ngim lah ban len hadien jong ka jingïakhih jong ngi, ka sorkar Assam kala pynmih ïaka Notification RSR/ 296/ 51/ 130 haka 13th March 1957 bad pynsangeh shwa ïaka tei ka Notification 13th April. Bad ki artylli ki District Councils, United Cachar & Mikirs Hills bad United & Khasi Jaiñtia Hills kila dep survey ïaka ban re-transfer biang ïakane ka jaka sha United Khasi & Jaiñtia Hills District Council haka 17 tarik February 1958. Hynrei haduh mynta mynne ïakane ka kam ym pat pyndep satia, ong u Chairman jong ka Forum u Bah Chandame Sungoh.
Shuh shuh u bah Chandame Sungoh u ong ba kum ka Forum kin ïai kynmaw sah ïakane ka sngi kum ka Black ne Mourning Day manla u snem tad ynda la lah ban re-transfer ne pynïasoh biang ïaka Block-1 & 2 sha Ri Khasi Jaiñtia kumba juh long naduh hyndai hynthai kulong kumah.