Shillong, Ïaïong 13: Ka Seng Khasi Sengkmie Mawkhar ha ka sngi Nyngkong ka la rakhe ïa ka sngi kaba khatduh jong ka Shad Suk Mynsiem kaba lai sngi kumba ju long manla u snem. Kane ka jingrakhe ia ka Shad Suk Mynsiem mynta u snem ka la long kaba 115 snem naduh ba la sdang ïa ka ha u snem 1911 bad kaba la ïaibteng haduh kine ki sngi.
Kumba la sakhi la ïohi ba ki khun ki hajar jong ka jingngeit tynrai u Khasi ki la tuid ha kine ki lai sngi naduh ka sngi saitjaiñ haduh ka sngi ba kut ka 13 tarik.
Haba batai shaphang ka jinglong pher bad phylla jong kane ka Shad Suk Mynsiem mynta u snem sha ki lad pathai khubor u Rgh. P.D. Nongrum Vice President, u Rgh D L Nongbri Vice President bad u Rgh Rangpher Rynjah dkhot ka Jylla Pyrkhat Kam (JPK) ki la ïathuh ba naduh ba sdang ka Shad Suk Mynsiem jong kane ka aïom kiba bun hi kiba shim bynta dei ki samla naduh ka sngi nohkjat bad kumjuh ruh haduh ka tem ka put ruh dei hi da ki samla kiba la lamkhmat lyngba ki 7 tylli ki skit.
Kumta ki la pynpaw ba kaba pher bha mynta u snem ka long ka jingïashim bynta ba shitrhem ki samla ban pyntyllun ïa ki kam, ban sngewthuh ruh ka jingdonkam ban pynneh pynsah ïa ka riti dustur naduh u kñi u kong, ki longshwa manshwa, ban bat la tynrai bad ban nang pynïar shuh shuh ïa ka.
Ha kane ka sngi la sakhi lang u Symbud Myntri Rangbah ka jylla u Bah Prestone Tynsong, u Myntri ka Tnat Arts and Culture u Bah Sanbor Shullai, u MLA ka North Shillong u Bah Adelbert Nongrum, u Chairman ka KHADC u Bah Strong Piller Kharjana, u EM ka Elaka u Bah Denzil Chen, ka DC East Khasi Hills, nalor kiwei kiwei.
Ki nongshad baroh ki long shynrang ki don 964 ngut, ki kynthei 846 ngut bad baroh ki long 1810 ngut.
Na ka liang kitei ki nongïalam ki la ïathuh ruh ba kane ka Shad Suk Mynsiem ka dei ruh ka nguh ka dem blei ban ainguh ïa baroh ki jingkyrkhu ba u la theh ha baroh ki liang ha kine ki saw aïom jong ka por bad u snem.
“Kaei kaba kongsan bha ka long ba ki samla ki la shim bynta bha khamtam kito kiba dang hapoh ka rta kaba 25 snem kiba dei ruh ki pateng jong ka lawei ban pynneh pynsah la ka jong ka tynrai. Ngi burom ïa kiwei bad ngi hap ieid shwa pat ïa la ka jong ka tynrai,” bynrap u Vice President u Bah P D Nongrum.
Ha kine ki 3 sngi la sakhi ba naduh ki hep kiba rit haduh kiba la san la rangbah bad kiba khambun pat na baroh dei hi ki khun ki samla jong ka bri u Hynñiewtrep kiba la shim bynta bha shitrhem ha baroh ki liang ban ïarap ban pynïaid beit ïaid ryntih ïa kane ka Shad Suk Mynsiem ha une u snem.
