Pynthikna u Conrad ba 6 tarik yn pynlip noh ka PDF ïa u Mombati ban ryngkoh sha ka NPP
Bym sngew mon ban ryngkoh lang mih noh u Bah James
![](https://mawphor.com/wp-content/uploads/2022/05/HC.jpg)
Shillong, Jymmang 03: U Myntri Rangbah ka jylla uba long ruh u National President ka NPP u Conrad K Sangma ha ka sngi Balang u la pynthikna ba ki arngut ki MLA ka People’s Democratic Front (PDF) rygkat ka party baroh kawei ki la rai ban pynïasoh noh (merge) bad ka NPP ha ka 6 mynta u bnai.
Haba kren ha ka jingialap elekshon na bynta u kyrtong ka NPP na Sohiong, u Conrad u la ong, “Ka PDF ka la lum ia ka CEC jong ka ha ka sngi Ba-ar bad ha kane ka jingialang da kawei ka sur ki la rai ban wan pyniasnoh bad ka NPP bad na ka liang jong ngi ngin pdiang sngewbha ia ki nongialam bad ki nongtrei ka PDF ha ka 6 tarik Jymmang”.
Ha kawei pat ka liang, u Vice President ka People’s Democratic Front (PDF) u Bah James Ban Basaiawmoit ha ka sngi Balang u la aiti ia ka shithi iehnoh kam kum u Vice President ka party hadien ba um sngew mon ban ryngkoh lang sha ka NPP bad ia kane ka shiti iehnoh mihnoh na ka PDF u la leit ban aiti sha u President ka party u Bah Gavin M Mylliem ha ophis treikam ka party.
Haba kren sha ki lad pathai khubor hadien ba u la dep ban aiti ïa ka jingiehnoh ïa ka jinglong dkhot na ka party u Bah James u la ong ba ka daw ka dei namar um sngew mon ban leit sha ka NPP kumba la rai da ka CEC jong ka PDF kaba la lum ha ka sngi Baar.
“Namar ka CEC kaba la long hynnin ka sngi da kawei ka rai ki la shim ban pynïasnoh (Merge) ïa ka PDF bad ka NPP nga tang marwei ngan lah leh aiu haba kiwei ki la rai na kata ka daw nga rai ban mih noh na ka PDF shuwa ban jia kane ka jingpynlip noh ïa u mombati ka PDF,” u la ong,
Haba ïadei bad ka rai ka PDF ban pynïasnoh sha ka NPP u Bah James u la ong, “Naduh kaba sdang la seng ïa ka party ba kan long ka party riewlum ban kren ïa ka jingeh ka imlang sahlang bad ka jaidbynriew hynrei da ka rai ban kylliap lama ne pynïasoh noh shawei ka pynlong wat ïa u paidbah ban ngiah noh namar kiba bun kum kine ki jingjia u la sakhi.”