Kyrmen ka ïingbishar ba ka jingpynïeng ïa ki Weigh Bridge yn tehlakam ïa ki trok kit palat pud

Shillong, Jymmang 03: Ka High Court (HC) of Meghalaya ha ka sngi Balang ka pynpaw ïa ka jingkhmih lynti jong ka bad da ka jingpynïeng ka sorkar ïa ki weighbridge bad ki jaka talasi yn lah ban teh lakam ïa ka jingkynrei ki trok kit palat pud kiba ïaid sahuh ha ki surok bah.
Haba shim bishar ïa ka PIL ba la ujor da u Tennydard M Marak da ki arngut ki nongbishar u Chief Justice ka HC u Justice Sanjib Banerjee bad Justice W Diengdoh, “Kumba ngi la ong ha ka hukum ba la pynmih ha ka sien shong bishar kaba la de, ka jingdon ki weighbridge bad ki jaka talasi yn pynïeng kham bun,” ong ka hukum.
Ka HC ka ong ruh ba kine ki weighbridge bad ki jaka talasi kiban pynïeng thymmai dei ban buh ha ki jaka ba don ki parmaw.
“Nalorkata, ki weigh-pads, kaba, kat kum ka jingong ka Jylla, kan shongdor T. 27 lak kawei, dei ban thied noh ha kaban pyndonkam ha ki jaka ba kongsan” la bynrap ha ka hukum.
Ka sorkar jylla ka la pyntip ruh ïa ka kashari ba ka la pyndep ban pynlong ïa ki prokram pynsngewthuh hapdeng ki nongtrei Sorkar bad kiwei ki kynhun khnang ban pyntip ba ki trok ba kit palat pud kin nym ïaid shuh ha ki surok ka Jylla lane National Highway ha Jylla.
Shuh shuh ka HC ka khmih lynti ba ka sorkar kumba ka kular ban pynïeng ïa 23 tylli ki weighbridge ki dei ban long kiba la treikam ha shuwa ban shim bishar biang ïa kane ka PIL.
Na ka liang ka sorkar ka la pyntip ruh ba lyngba ka kyrwoh kaba ka pynmih hapoh ka Section 194 jong ka Motor Vehicles Act, 1988 ba lada don kino kino kiba kit palat pud dei ban pyhap mardor ïa ka jingkit palat pud.
Ka Kashari ka la bthah ba ka sorkar kan aiti ïa ka kaiphot kaba bniah halor kane bad yn shong bishar biang ha ka 16 tarik Jylliew.