Shillong, Jymmang 03: Ka Jingpynbna paidbah ne ka Nottification ba la pynmih da ka KHADC ka la bthah ïa ki Rangbah Shnong, ki Sordar bad kiwei kiwei ki Khlieh Nongsynshar ba kidei ban ai Certificate Shnong tang ïa kito kiba shim jait na ka Kmie. Kane ka jingpynbna jong ka KHADC ka mut ba baroh kiba shim jait na u Kpa kim dei shuh ki Khasi ne ki Riewlum.
Kane ka jingpynbna da ka KHADC khlem pep kan wanrah ka huri hura bad ka jingkulmar kaba jur ha kaba ïadei bad ka elekshon MDC kaban wan ha u snem 2024. Ka kyndon kaba 128 na ka Part IV, Chapter 2 jong ka Assam and Meghalaya Districts (Constitution of District Council) Rules,1951, ki bym lah ban thep vote ha ka elekshon District Council kidei tang kito ki bym dei napdeng ki Schedule Tribe ne ki Riewlum, lait noh tang lada u udei u nongshongshnong ba pura hapoh u pud u sam ka District Council.
Te katkum ka jingpynbna da ka KHADC ba kiba shim jait na u Kpa kim dei shuh ban ïoh ïa ka Scheduled Tribe Certificate kaba mut kim dei shuh ki riewlum. Haba kumta haba kim dei shuh ki Riewlum, hato ki dang lah ne em ban ïashim bynta ha ka elekshon MDC ne ki lad ne em ban long ki kyrtong ne ki nongthep vote jong ka KHADC?. Lada ki ïoh rung ha ka kyrteng thep vote katkum katei ka Rule 128, kum kita ki nongshongshnong ba pura jong ki jaka ba hap hapoh u pud u sam ka KHADC, te kan eh aiu ba u nongwei u nongar ne u mynder uba la wan buhai shnong hangne bad long u nongshongshnon ba pura ka KHADC ban ïashim bynta ha ka elekshon MDC.
Ki don shibun ki jingkylli halor kane, namar ba lada kam kheiñ Khasi shuh ïa kiba ai jait Kpa kan kheiñ ïa ki pat kum kiei? Nangta kam kheiñ ïa ki ba kidei ki Khasi ne kita ki riewlum kumno kan pan jingkyrshan ïa ka vote jong ki ha ka por elekshon MDC. Hato kane kam dei ka jingleh kaba arsap ba tang na ka bynta ka jingmynroi elekshon, u Khasi ai jait kpa ruh biang beit lada u kyrshan.
Nangta kan pynpharia ruh ïa ka jaidbynriew, namar ba ka Jaiñtia Hills Autonomous District Council (JHADC) kam shym la don satia ka aiñ kaba kum kane, kaba mut ha Jaiñtia Hills lada shim jait na u kpa ne na ka kmie kidei khi ki Khasi ne ki Riewlum. Katba sha KHADC pat kiba shim jait Kpa kim dei shuh ki Khasi ne ki Riewlum. Kajuh ka jaidbynriew, hynrei la ïapher ka jinglong jaidbynriew tang namar ka jingshim jait.
