Ha ka General Council yn shim rai ka PDF ban pynïasoh sha ka NPP

0

Shillong, Jymmang 3 : Ki nongïalam jongka Peoples Democratic Front (PDF) kin shim ïa ka rai kaba khatduh na ka bynta ban pynïasoh sha ka NPP ha ka General Council kaba lah ban long ha ka 5 tarik mynta u bnai.
Haba ïakren bad u Working President ka PDF u bah Banteidor Lyngdoh u MLA ka Mawkynrew u la ong “ Ngin sa ïakren sani bha ïa kane ka kam ha ka General Council bad hadien kata ngin sa shim ïa ka rai ban pynïasoh sha ka NPP namar ngi kwah ba baroh ki nongïalam bad nongkitkam ka party kin ïa mynjur lang halor kane ka kam”.
Lah ban pynkynmaw wat la ka jingïakren ka dang ïaid shakhmat hynrei na ka liang ki nongïalam ka NPP naduh u National President bad Myntri Rangbah u Conrad K Sangma haduh u National Vice President bad Synbud Myntri Rangbah bah Prestone Tynsong ki la dep pynbna na ki rynsan ïalap election jongki ha ka Election ha Sohiong Constituency ba ki arngut ki MLA ka PDF kata u bah Banteidor Lyngdoh, bah Gavin Miguel Mylliem lem bad ki nongïalam ka party kin pyniasoh noh sha ka NPP ha ka 6 tarik mynta u bnai kaba dei ha kane ka Sngi Saitjaiñ ban wan.
Kane ka pynpaw shai kdar ba ka jingïapynbeit ka la biang lut nadong shadong hynrei kaba sah ka long sa tang ban pyndep ïa ka jingïakynduh kum ka General Council shwa ban khylliap ïa ka lama jongka PDF bad pynlip noh ïa u symbol jongka u mombati.

Leave A Reply

Your email address will not be published.