Shillong, Jymmang, 03: Ki dkhot jong ka Hynñiewtrep National Youth Movement (HNYM) kiba la dap da ka jingbitar ha ka sngi Balang ki la tur sha ka ophis treikam jong ka ophis u Syiem ka Hima Mylliem da ka jingthmu ban khang tala ïa kane ka ophis treikam jong ka Hima hadien ba ka seng ka la kynnoh ba ka ophis jong ka Hima Mylliem ka la pynkupbor ïa ki Garo ban long ki nongpeit nongkhmih ïa ka synshar ka khadar ha ki shnong ba la buhai shnong da ki Garo hapoh ka Raid Marwet, Ribhoi District.
Ki dkhot jong ka seng ki la shah pakhang lynti ha ki Myntri katba ki dang rung shapoh ka Ophis treikam jong ka Hima Mylliem kat haduh ba ka la mih ka jingthalaiñ nia kaba jur hapdeng u Basan jong ka Raid Nongkseh, katto katne ngut ki Myntri bad u President jong ka HNYM u Bah Louis Dohtdong.
Ha ka jingïakren bad ki lad pathai khubor, u Bah Louis Dohtdong u la ong, “kane kam dei shuh kaba thymmai bad ka seng ka la buddien halor ka jinglong Rangbah Shnong jong ki Garo hapoh ka khyndew ka shyiap jong ka jaidbynriew jong ngi, ngi la pyrshah. Ka Hima ka la pynthikna ba ka la ai shithi ba kim dei shuh ban kam ïalade kum ki Rangbah Shong namarba kim don ïa ka hok ban kam rangbah shnong hapoh ka khyndew ka shyiap jong ka jaidbynriew jong ngi. Kaba sngew lynngoh dang ha ka taïew bakhatduh jong u bnai Ïaiong, kine ki Garo ki dang ai biang ïa ka No Objection Certificate sha ki jaidbynriew Hmar ba kin tih pukri um. Kane ka la jia hynriew bnai hadien ba ka seng ka la ïaid shakhmat ban ong ïa ka Hima Mylliem ban phah pynsangeh noh.”
“Hadien ba ngi la ïoh ïa ka jingleh donbor jong ki jaidbynriew Garo ngim banse ban wan shane (sha Ophis u Syiem ka Hima Mylliem) ban pynbor ïa ka Hima ba ka dei ban pynduh noh ïa kine ki Rangbah Shnong baroh. Ngim pynïapher jaidbynriew ïano tangba haba ngi don la ka jong ka khyndew ka shyiap, haba phi don ka la ka jong ka jaka na kata ka daw ba phin wan long trai ha ka jaka jong ngi ngin ym pdiang daleilei ruh em,” la ong u Bah Dohtdong.
“Ka Hima Mylliem ka la pynkheiñ ïa ka jingïashong jingïalang bad ngi hapoh kane ka Ophis bad u Syiem Ainam ruh ngi la shong jingïalang bad ngi la ai jingmut ba ïa ki Circle Rangbah Shnong ka Hima ka dei ban ai da ka jingpynbna ba kine ki Rangbah Shnong kiba dei ki Khasi kin dup lah ban tehlakam ïa ka jingleh be-aiñ jong kiwei ki jaidbynriew,” la bynrap u nongïalam ka Seng.
“Ïa ka aplikeshon jong ki Rangbah Shnong ym shym la pdiang hangne hynrei ngi shu ïohi syndet mynta ba ladep mynjur da ka District Council ïa ka thup kyrteng jong ki Rangbah Shnong lyngba ka jingai jingmut jong ka Hima Mylliem. Kata ka la pynbitar ïa ngi nalor ba ngi dang sngewkhia ïa la ka khyndew ka shyiap hynrei teng teng kine ki pynlong pynban ki nongshun jong ki,” u la ong.
U la ong ruh ba wat ka Hima kam shym la pdiang ïa ka jingai jingmut jong ka seng ban bsut ïa ka kyntien Rangbah Shnong Pyllun katba u Syiem ka Hima Mylliem ula thoh beit da ka kyntien Circle Rangbah Shnong.
“Kane ka dei ka jingleh sop sop jong ka ophis ka Hima Mylliem bad u Syiem ka Raid Marwet. Ngi la kren shai ba u Syiem ka Raid Marwet um ieid ïa ka jaidbynriew bad um don bynta hi ruh bad ka khyndew ka shyiap jong ka jaidbynriew bad na kata ka daw um salia hi ruh ban die ka khyndew ka shyiap jong ka Hima,” la kynnoh u Bah Dohtdong.
“Ka Hima Mylliem kam dei ka nongkynti jongno jongno hynrei ha ka synshar ka khadar jong u Khasi ïa ka khyndew ka shyiap ym don mano mano ruh ba la lah ban kam trai bad ngi ïohi ba ka Hima ka la sdang ban shim nongkynti pynban ïalade da kaba ïadie ïathied jaka pathar hapoh Raid Marwet. Ngi ïohi ba ki Hmar ki Mizo, ki Naga ki la ïoh ban thied jaka ha Raid Marwet,” la kynnoh u Bah Dohtdong.
U la ong ba ka seng ka kren da kaba shai katba ka Hima Mylliem kam pat pyndep ïa ka jingkhot aplikeshon ka seng ka kwah ba ïohi ïa ki aplikeshon jong ki Circle Rangbah Shnong kiba aplai ha Raid Marwet. “Hynrei haduh mynta kim pat pyni satia ïa ngi wat hadien ba ngi la aiti da ka jingthoh hynrei ka mih pynban da ka thup kaba ladep mynjur. Kane ka dei ka jingleh ka bym sngewtynnat bad kaba shu leh buhrieh ïa ki jingshisha,” u la ong.
U la ïathuh ba u Basan ka Raid Nongkseh u la kular ban pyndam noh ïa ka jingpynbna ba ladep ai jingmynjur da ka District Council.
“Ngin ai por tang hapoh lai sngi ïa ka ophis jong u Syiem ka Hima Mylliem ba ka dei ban phah pynphai lut ïa ka muhor bad ka Letter Head jong ki Rangbah Shnong Garo hynrei lym kumta ngin wan hangne da kawei pat ka rukom,”la byrngem une u nongïalam ka HNYM.
