Shillong, Jymmang 03 : Ki pulit ka Jylla shen kin sa hiar sha Rajasthan ban leit buddien bad tohkit halor ka jingiap kyndit jong kawei ka samla na ka jylla kaba pule ha Mody University, ha ka 27tarik u Iaiong mynta u snem.
Katei ka samla ba dang 19 snem ka rta kaba tip kyrteng kum ka Walinda Binong kadei kaba shong ba sah ha ka shnong Nongangang Marngar Ri-Bhoi District. Kadei ruh ka khun khatduh jong u Bah Rubi Binong bad ka Kong Kobita Syiem.
Halor kane ka jingjia, u Symbud Myntri Rangbah ka Jylla ba peit ïa ka tnad Kampohïing ka Jylla, Bah Prestone Tynsong u la ong, “Ngi la bthah ïa u Superintendent of Police jongngi bad na ka liang jong u, u la dep ban ïa kren bad ki pulit na katei ka jylla bad ka jingtohkit ka la ïaid shakhmat.”
U Bah Prestone u la ïathuh ruh ba shen ki pulit ka jylla kin sa leit sha Rajasthan ban buddien bad tohkit bniah kumno ka jia ka ban poi haduh u pud ka jingiap jong katei ka samla pule.
La ong ruh ba ka jingleit jong ki pulit ka jylla ka long ban tih bniah ïa ka daw tynrai la ka jingiap jong katei ka samla kadei ba ka iap hi lane na ki daw kiba don jingartatien.
