Shillong, Jymmang 03 : Ka North East Student’s Organisation (NESO) lem bad ka Khasi Student Union (KSU) kaba dei ka dkhot jongka NESO kila pynpaw ka jingsngewkhia bad jingbynniaw kaba jur halor ka jingkyndang jong ka Sorkar Manipur ïa ki jaidbynriew Zo bad kumjuh ruh ïa ki Khasi na ki shnong ba ki sah ha ka nongrim ba ki shong ki sah ha ki khlaw sorkar ne reserve forest jong katei ka Jylla.
“Ka NESO lyngba kane ka kyrwoh ka pynpaw ïa ka jingsngewkhia halor ka jingjia ba dang shen ha Manipur ha kaba ka Sorkar Manipur kala kyndang ïa ki paid riewlum ka Jylla kiba dei ki Jaidbynriew Zo bad ki jingkulmar kiba mih hadien kane” ong ka kyrwoh na u Chairman ka NESO Bah Samuel B Jyrwa bad Secretary General Mutsikhyo Thobo.
Ka NESO kala ong ba la kyndang ïa kine ki paid riewlum ha ka nongrim ba ki shong ki sah ha ki khlaw Reserve hynrei ka jingshisha pat ka long ba kine ki nongshongshnong kila shong la sah ha kane ka jaka da ki phew phew snem.
Kumjuh ruh ka NESO kala pynkynmaw ba ha u bnai ba la lah, ka Sorkar Manipur kala pyrshang ban kyndang ïa ki Jaidbynriew Khasi kiba shong shnong ha ka thaiñ, kiba la shong shnong ha kane ka jaka naduh kulong kumah.
“Ka Sorkar Manipur kan hap ban pdiang ba kine ki dei ki jaidbynriew riewlum jong ka thaiñ Shatei Lam Mihngi bad ki la shong la sah ha kine ki jaka naduh ka por ki longshuwa manshuwa bad ba kim dei satia ki poiwir na Nepal lane Bangladesh” ong ka NESO.
Ka NESO kala khot ïa ka seng All Manipur Students Union (AMSU) bad ka Mizo Zirlai Pawl (MZP) ba kin shim ïa ka sienjam bad ban iatreilang hapdeng jong ki khnang ba kan wanrah ïa ka jingjai jai bad ban tehlakam ïa kano kano ka jingkyn-ad pher jaidbynriew.
Ha kajuh ka por, ka NESO kala wer ïa baroh ki jaidbynriew riewlum ba kin pynneh ïa ka jingshongsuk bad ban burom ïa ka jingïadei kaba la ïatei naduh ki pateng la pateng.
Kumjuh ruh ka KSU kawei na ki dkhot jongka NESO ka pynpaw ka jingsngewkhia jur halor ka jingshah kyndang ki jaidbynriew Khasi kiba sah ha Tamenglong District ka Manipur.
U General Secretary ka KSU u samla Donald V Thabah u la ong ka jingwan kyntur jong ki Bengali bad kiwei ki jaidbynriew sha katei ka jaka ba la sah da ki paid Khasi naduh kulong kumah ka ïai bteng beit wat hadien ba u Myntri Rangbah ka Manipur u Biren Singh u la kular ïa ki dkhot ka KSU ha Imphal shisnem mynshwa ban kyndang noh ïa kitei kiba wan kyntur pud ha katei ka jaka.
Kumjuh ruh ka tnad Forest ka la khang ïa ki paid Khasi ban rep rubber bad kwai ha la ki jong ki jaka jongki katba kiwei kiwei kiba wan sah beaiñ ki dang rep dang riang ha ki jaka jong ki paid Khasi. Ka la dei ka por ba ka sorkar Manipur ka dei ban shim khia ban ïada ïa ki paid Khasi kiba sah ha Manipur bad ban pynthikna ba ki ïa im suk im saiñ khlem kino kino ki jingshah thombor.
Kiwei kiwei ki dkhot ka NESO ki long All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) bad All Arunachal Pradesh Students’ Union (AAPSU).
