Kiwei ki party ba don ha jrong bos kin hap ïaid noh da ka kjat : Bah Prestone
Hadien khyndiat bnai ngin sa poi 31ngut ki MLA
Shillong, Jymmang 3 : U National Vice President ka NPP ba dei ruh u Symbud Myntri Rangbah ka Jylla, u Bah Prestone Tynsong u ong ba hadien ka 6 tarik mynta u bnai ka party kan sa kiew sha ka 28 ngut ki MLA bad hadien ka 13 tarik pat kan sa kot sha ka 29 ngut bad bud pat sa kumba arngut ki MLA ha ki khyndiat bnai ban wan.
Haba kren ha ka jingïalang ïalap elekshon na bynta u kyrtong ka party ha Lyngkhoi, Sohiong, utei u nongïalam ka party u ong ruh ba ha kane ka sngi Saitjain kin sa pdiang burom ïa arngut ki MLA na kawei ka party (PDF) kiban wan pynïasoh pura noh sha ka party.
“Ha ka 13 tarik pat ngin sa ïoh sa uwei ban long 29 ngut. Nangta sa katto katne tylli ki bnai lah ban ïoh shuh sa ar ban poi 31 ngut,” la bynrap shuh shuh u Bah Prestone.
Utei u heh ka NPP watla um shym la kren beit hynrei u la shu kren siat da kaba ong ba ong ba kito ki paralok ba shong ha jrong bos (ïa kiwei ki MLA na kiwei ki party ba trei lang ha ka MDA), ba ka don ka aiñ kaba eh bha jong ka Ministry of Road Transport ka sorkar pdeng.
“Tang bakla tiak ki draibar ki lah ban shah kem ne shah daiñ kuna. Te lada poi katta ka jingdon ki MLA, kaba nga kwah ban ong ïa ki paralok ba shong ha jrong bos, nga panmap na phi sngewbha hiar noh na bos bad ïaid da ka kjat. Ka por kan sa poi ba phin hap ïaid noh da ka kjat ïoh kumno kumno phin hap kynsan na jrong bos,” u la bynrap shuh shuh.
Nalorkata, u ong ruh ba dei tang ha ka por elekshon ba ki party rit part ria ki pynsngewthuh bakla.
Haba bynrap lang u kyrtong ka NPP na Sohiong Bah Samlin Malngiang u la ong ba kiwei ki party kin ym lah satia ban tan ïa ki nongkyrshan jong ka NPP namar kidei kiba stad bad kiba sngewrit.
Haba kren ha ka jingïalang ïalap elekshon ha Lyngkhoi hynne ka sngi u Bah Samlin u ong ruh ba hynin ka sngi ki la ïoh ruh ban pdiang burom haduh 200 ngut ki nongkyrshan na ka UDP.
Shuh shuh u ong ruh ba da ka jingtrei borbah ki nongtrei party ki don ka jingkyrmen ba kin tam bun hajar vote mynta ka kynti.
Ha kane ka sngi la ïoh ruh ia ka jingkren na u MLA ka Jowai Bah Wailad Shylla, nangta na u CEM ka JHADC Bah Thombor Shiwat uba la wan ryngkat bad 12 ngut ki MDC, nangta u MDC ka Sohiong, Bah Sherbor Mawlong, Bah Bajop Pyngrope, Bah Kit Nongrem nalor ki nongïalam jong ka party na katei ka thaiñ.