Shillong, Jymmang 05: U Myntri Rangbah ka Jylla Conrad Kongkal Sangma hynne ka sngi palei ula pynthikna ba ka Sorkar Jylla kan sa shim ïa ki sienjam ban pynthikna ïa ka jingshngaiñ jong ka Jingkieng ka Pung Umiam.
Kane ka jingkren u CM kala mih tang shisngi ba ka Ïingkashari High Court kala hukum ïa ka Jylla ban khang noh ïa ka jingïaid ki kali kit mar ba palat 10 metric ton na Jingkieng Umiam hadien ka jingai jingmut ba kane ka jingkieng ka lah ban nym lah kyrda ïa ka jingïaid ki kali ba kit khia.
Haba ïakren bad ki nongthoh khubor, u Conrad ula ong ba ka Sorkar Jylla kan sa shong bishar ïa ka hukum jong ka Ïingkashari bad kan sa shim ïa ki sienjam ba dei ban shim.
“Ka jingsngewkhia bala pynpaw da ka Ïingkashari ka dei ruh ka jingsngewkhia jong baroh ki Nongshongshnong bad wat ka Sorkar Jylla…namar kata ngin sa shong bishar bin pa bin bad ngin sa shim ïa ki sienjam ban pynthikna ba kaei kaba ngin leh ha kaban pynthikna ïa ka jingshngaiñ jong ka Pung” ong u Myntri Rangbah.
Ha ka jingshong bishar ïa ka PIL hynnin ka sngi balang, ka Ïingkashari kala shimkhia ïa ki jingai jingmut jong ka National Highway Authority of India (NHAI) bad Border Roads Organisation (BRO) ba dei ban tei thymmai noh ïa kawei pat ka jingkieng ban bujli ïa ka jingkieng Umiam ba mynta khnang ba kan lah kyrda ïa ka jingïaid ki kali manla ka sngi.
Ka BRO kala pynpaw ruh ha ka affidavit ba ym dei shuh ban sha ïa ki kali ba khia palat ïa ka 10 MT ba kin ïaid na kane ka jingkieng.
Ka Ïingkashari ki arngut ki Nongbishar ba kynthup ïa u Chief Justice Sanjib Banerjee bad u Justice W Diengdoh, kala ong ba ym don satia ka jingartatien ïa ka jingai jingmut ba kane ka jingkieng ha Umiam, ka lah ban nym lah kyrda ïa ka jingïaid ki kali heh ba khlem sangeh.
“Kane ka jinglong jingman ka dawa ba dei ban leh eiei noh mardor khnang ba kan nym dkut ka jingpyniasoh ïa ka Nongbah Shillong lada ym don ka jingkieng da kawei pat ha kane ka pung” kala ong.
Ka Ïingkashari kala bthah ïa ka Sorkar Jylla ban pyrshang kat ki lynti ha kaban pynthikna ba kan don ka jingpyrkhat ïa ka jingkieng thymmai bad ban pyntrei ruh wut wut ïa ka khlem da ap haduh ban da khyllem ne twa kane ka jing kieng ba mynta.
“Ka Sorkar Jylla ka dei ruh ban phah pynïaid ïa ka rukom ïaid jong ki kali ha kane ka jingkieng khnang ban pynthikna ba ym tang ïa ki kali ba kit palat ïa ka 10MT ba ym shah ban ïaid hynrei ban ym shah ruh wat ban ïaid haduh artylli ki kali heh ha kajuh ka por kaba lah ban nang wanrah ïa ka jingsynjor” kala ong.
Ka Ïingkashari kala png ba ka sorkar ka dei ban shim ïa ki lad ki lynti kumno ban pynïaid ïa ki kali na baroh ar liang bad ruh ban nym shah ïa bun tylli ki kali ba kin ïaid ha kajuh ka por na ka jingkieng, haba buh ha ka jingmut jing pyrkhat ïa ka jingkhlaiñ bor jong ka jingkieng ban kyrshan”.
Ka Ïingkashari kala pynpaw ruh ba ka Sorkar Jyla ka lah ban leit ïakren bad ka Sorkar Pdeng ba kan iarap pyllait pisa khamtam ba kane ka jingkieng ka dei kaba pynjan eh ïa ka nongbah Shillong.
