100% kiew ka mang tyngka ban pynbha ïa ki surok ha North East : Kishan Reddy

0

Guwahati, Jymmang, 05: U Myntri ka Sorkar Pdeng uba khmih ïa ka Development of North East Region (DoNER) u Kishan Reddy ha ka sngi Balang u la pdiang sngewbha ïa ki Lat bad ïa ki Myntri Rangbah jong ka thaiñ Shatei Lammihngi bad ïa ki Myntri Sorkar Pdeng ha ka jingïalang ïamir jingmut halor ki mat ba kongsan ba ïadei bad ka roi ka par jong ka thaiñ Shatei Lammihngi.
Ha kane ka jingïalang la ïadonlang u Lat jong ka jylla Arunachal Pradesh u Brig. B D Mishra, u Lat ka jylla Manipur u L.A. Ganesan, u Myntri Rangbah jong ka jylla Arunachal Pradesh u Pema Khandu, u Myntri Rangbah jong ka jylla Tripura u Biplab Kumar Dev, u Myntri Rangbah jong ka jylla Nagaland u Neiphiu Rio, u Myntri Rangbah jong ka Manipur u N. Biren Singh, u Myntri ka Sorkar Pdeng ba khmih ïa ka tnat Law and Justice u Kiren Rijiju ji, u Myntri Khynnah jong ka Sorkar Pdeng ba dei khmih ïa ka tnat DoNER bad Cooperation, u B.L. Verma, ka Myntri Khynnah jong ka Sorkar Pdeng ba khmih ïa ka Tnat Social Justice and Empowerment ka Kumari Pratima Bhowmik, u Myntri Khynnah jong ka Sorkar Pdeng ba dei khmih ïa ka tnat Labour and Employment u Rameshwar Teli, u Myntri ka tnat Jngohkai Pyrthei ka jylla Mizoram u Robert Romawia Royte bad u Myntri ka tnat Jngohkai Pyrthei jong ka jylla Sikkim u B.S Panth.
U Reddy u la ai ka jingïaroh ïa baroh ki kynrem ki lyndan kiba la ïasam ïa ki bynta ba kongsan bad ki jingeh jong ki Jylla jong ki bad ka thaiñ Shatei Lammihngi hi baroh kawei.
U la ong ka jingïalang ha kane ka sngi ka dei kawei ka nuksa jong ka jingpynthikna ka jingïatreilang hapdeng ka Sorkar Pdeng bad ki Sorkar Jylla na ka bynta ka roi ka par kaba pura jong ka thaiñ Shatei Lammihngi. U la ong ba ki jingsngewthuh ba la ïoh lyngba ki jingïalang kin long kiba kongsan ha ka jingsaiñdur ïa ki polisi, ki prokram bad ki projek kiba ïadei bad ki jinglong jong ka thaiñ Shatei Lammihngi .
U Reddy u la ong ruh ba ka la don ka jingkiew kaba haduh 100% ha ka mang tyngka na ka bynta ka thaiñ Shatei Lammihngi. U la ong ruh kumba 6000 klur la mang na ka bynta ki jylla ka thaiñ Shatei Lammihngi hapoh ka Oil palm Mission.
U la ong baroh ki mat ba la pynsngew la shimkhia da ki ophisar jong ka tnat DoNER.
U la bynrap ba ha ka jingïalang G20 ka ban sa long, yn pynlong kumba 8 tylli ki jingïalang ha phra tylli ki jylla bad yn ithuh ïa ki jaka ba biang na ka bynta kane. U la kren ruh halor ka jingleit sha ki shnong khappud kaba yn sa pynbeit bad ki Nodal Officer na ka bynta ka jingurlong ki kam.
U la pyntip ruh shaphang ka jingthmu jong u na ka bynta ka Yoga Day bad ki jingrakhe ha ka 15 tarik Nailar. U la ong ba dei ban pynlong ïa ka prokram ‘har ghar jhanda’ da ka mynsiem shitrhem, ha kaba man ka iing kadei ban pynher ïa la Lama jong ka ri da ka jingsngewsarong.
U la kyrpad ruh ka jingleit jngoh ïa ka thaiñ Shatei Lammihngi bad pynthikna ka jingthmu ban leit jngoh ïa ka thaiñ Shatei Lammihngi bad ka thong jong kane ka prokram kan urlong. Kane ka long ka thong jong u Myntri Rangbah duh u Narendra Modi ban pynthikna ka roi ka par na ka bynta ka thaiñ Shatei Lammihngi.
Baroh ki Myntri Rangbah bad ki Lat jong ki jylla ka thaiñ Shatei Lammihngi ki la ïasam ïa ki jingsngew, ki la ai jingmut ban jop ïa ki jingeh bad ki jingthut.
Ki Myntri Sorkar Pdeng kiba la ïadonlang ha kane ka jingïalang ruh ki la ïasam ïa la ki jingsngew bad ka thong ba ïadei bad ka thaiñ Shatei Lammihngi bad ki jingeh kiba ka Sorkar Pdeng ka donkam ban tuklar.

Leave A Reply

Your email address will not be published.