Shillong, Jymmang, 05: U Bah Myghter Marweiñ ha ka sngi Palei u la leit ban ai jingïarap ïa kawei ka longïing jong ka Kong Drula Snaitang da ki tin sop iing namarba kane ka iing ka la shah pynjot ha ka jingshahrong noh ha ka eriong ha ka 26 tarik u bnai Ïaiong, 2022.
U Bah Marweiñ uba dei Rangbah Shnong na ka shnong Nongjri u la ong ba ka jingleit ai jingïarap sha katei ka shnong ka long namarba ki Nongmihkhmat ka thaiñ kim shym la leh eiei ban ïarap ïa kane ka longïing kaba la mad ha kane ka jingwan lynshop jong ki bor ka mariang.
Ha ka jingaiti ïa ki tin sop ïing sha ka Kong Snaitang, la don lang ruh ki riewrangbah bad ki marjan marpa.
Ha kane kajuh ka sngi u Bah Marweiñ u la ai jingïarap ruh ïa ka kynhun ïalehkai hapoh ka shnong Domskhen da ki sopti ïalehkai sha ki samla jong ka shnong kiba don ha ka lama jong ka Domskhen Rum Sport Club bad Domskhen Sport.
