Pynthikna ka KHADC bad KAAC ban ïatreilang ban pynneh ïa ka shongsuk ha khappud ka thaiñ Block II

Nongpoh, Naitung 03: Ki nongmihkhmat naka Khasi Hills Autonomous District Council lem bad ka Karbi Anglong Autonomous District Council haka jingïakynduh lang mynta ka sngi ha ka shnong Ummat, Block II kila pynthikna ban ai ka jingïatreilang ban pynneh ïaka shong suk shongsaiñ ha katei ka jaka, ban nym wanrah kano kano ka jingsngewpher jaitbynriew khamtam kaba ktah ïaka shongsuk ki paidbah.
Watla naka liang u Avijit Kro MAC ka Chinthong Constituency jong ka KAAC u la kam ba ha kine ki snem bala leit noh kala don ka jingïa jngai haka rukom im bad ïajan hapdeng ki jaitbynriew Karbi bad ki Khasi ha katei ka thaiñ hynrei kila pynthikna ba kam dei ban mih kano kano ka jingkajia ka ba ktah ïaka shongsuk shongsaiñ ha katei ka thaiñ.
Lyngba katei ka jingïakynduh da ki nongïalam ka KHADC bad KAAC ha Ummat ka long ruh ka jingshngaiñ ïaki paidbah ba shong ba sah ha khappud, da kaba pynthikna ruh ba kam dei ban don kano kano ka jingpynthud ïaki paid Khasi bad kumjuh ruh ban burom mar kylliang haba ïadei bad ki kam pynroi kiba wan naka jylla Meghalaya ne Assam.
Naka liang u Bah Charles Marngar Dy.Chairman ka KHADC u la kren shai ruh hakhmat u nongmihkhmat ka KAAC ha katei ka sngi ba ka KAAC kam dei ban pynthud lano lano ruh ïaki kam pynroi jong ka jylla Meghalaya, hynrei ai ba ki kam pynroi kin ïaid ryngkat bad ka shongsuk shongsaiñ ban nym wanrah jingsyier ïaki paidbah ha kaba naka liang ka KAAC ruh kala kular ban burom mar kylliang, kumba ka jingpynbeit pud hapdeng ka sorkar Meghalaya bad Assam ka dang ïaid shakhmat haka wat kaba ar ha kaba ki ar jylla shen kin sa sdang ban leit jurip ïaki jaka lyngba ki Regional Committee bad khmih lynti ba ka jingpynbeit pud kan long kaba seisoh kumba angnud ki paidbah.