Lyngba ka Behdeiñkhlam yn pynduh jait ïa ki kam sniew (Khlam) pyrshah ïa ki khun Samla: President SRJ

Jowai, Naitung 03: Ka lehñiam shad Behdeiñkhlam jong ka Seiñ Raij Jowai mynta ka snem kaba ‘Saw sngi Lai miet’ kan sdang naduh ka sngi Pynsiñ jong ka 6 tarik u Naitung ban pynkut ha ka sngi Muchai 9 tarik u Naitung 2023.
U President ka Seiñ Raij Jowai ma O.R. Shallam haba ai jingkren sha ki lad pathai khubor mynta ka sngi ula ong ba ïa kane ka shad Behdieñkhlam la pynbna ïa ka kum ka sngi shuti hapoh ka jylla, hynrei mynta ka snem ka hap haka sngi U Blei bad la pynbna shuti noh haka 7 tarik u Naitung da u DC ka WJHD.
U kyrmen skhem ba ka Behdeiñkhlam mynta ka snem kan long kaba phuh ba phieng bad ka Seiñ Raij Jowai ka khot bad wer ïa baroh ki nongshong shnong ban wan sakhi ïa kane ka Behdeiñkhlam kaba la pynkhreh pynkhrum bha bad ïa ka jaka noh rot (Syiem Aitnar) la dep ban pynbha pynmiat ïa ka lyngba ka tnad Tourism jong ka sorkar jylla.
Ula ïathuh ha kane ka lehñiam Behdeiñkhlam ki tnad sorkar kiba don bynta ki kynthup naduh ka Arts & Culture, Tourism, NEC, ha kaba ka G-20 ruh kan kynthup lang ha kane ka Lehñiam. Kumjuh ruh ka seng Khasi Kmie, ki President bad Secretary ka Seiñ Raij Tuber, Ialong bad Chyrmang kin ban don bynta lang. Kumjuh u Lat ka jylla, ki Myntri sorkar, ki MLA ka Ri-Lum Jaiñtia, ki MDC nalor kiwei de.
Ula ong ba ka jingpyndep ïa ka lehñiam Behdeiñkhlam mynta ka snem kaba hakhmat ka long ‘ban pynduh jait ïa ki kam sniew kiba la teh la khun ïa ki khun samla kata naduh ka jingkyrni ha u Drug, ka kyiad, ki kam awria bad kiwei de, nalor ka pang ka shitom bad ka bamsap bampong’.
Shuh shuh ula ong lyngba kane ka Behdeiñkhlam kan wanrah syndon ïa ka bha ka miat, ka roi ka par ha ka ïing ka sem, ka shnong ka thaw bad ka ri hi baroh kawei.
Ha kaba ïadei bad ki kam ñiam kam rukom kiba la pyndep da u Dolloi, ki 13 Wasan, u Langdoh, ka Langdoh, u Pator, ki Sangot ki Maji, u Dhulia, u Sutia bad ki Phrakur Phra kmai, na ka liang u ma Puramon Kynjing kum u Dolloi ula pynsngew kala dei ka por bad pali ba u Langdoh Jowai un pyndep ïaka Lehñiam Behdeiñkhlam.
‘Ka nongrim jong ka Behdeiñkham ka long ban pyndep ïa ka shad ka kmen halor ki jingkyrkhu jong u nongbuh nongthaw lyngba ka mei mariang’ la ong u Dolloi bad kum ka jingburom ïa kine baroh kiba pyndap pynbiang ïa u khun bynriew kala dei ka por jong ka kmen ka risa da ka jingkyrmen kumjuh ïa kaba bha ka miat ha kane ka snem baroh shisnem.
Hashwa ka lehñiam Behdeiñkhlam la don ka lehñiam ‘Kñia Khang’ ka Kñia Pyrthat jong ki saw Langdoh bad poi sa ki ‘Saw sngi lai miet’ kaba pynpaw ïa ka jingkmen ha ka mynsiem, ka jingïaieit, ka jingkitkhlieh ban ïada ïa ka mei mariang kaba long ka nongkyrshan ha baroh ki liang jong ka jingim briew, la pynkut u Dolloi.
U General Secretary ma Arwotki Sumer u ai khublei Behdeiñkhlam ïa ki khun u Hynñiewtrep Hynñiewskum da ka jingkyrmen skhem kan wanrah ïa ka roi ka par, ka jingkoit jingkhiah bad ka jingbiang ha baroh ki liang, ha ka juh ka por u kyntu ban don ka jingïatreilang bad ka Seiñ Raij Jowai naduh ka rukom pynïaid ïa ka leit ka wan jong ki kali ki mator da kaba ïaishah shipor hapoh kine ki ‘Saw sngi Lai miet’.