Mawkyrwat, Rymphang 19 : Ki bor Distrik jong ka South West Khasi Hills District ha kane ka kynti ba mynta ka la ai ka jingpynthikna ba ka jingthep vote kaba dei hapoh ka Khasi Hills Autonomous District Council (KHADC) ka ban sa long ha ka 21 tarik u Rymphang, 2025 ka don shisha ka jingpynkhreh kaba la biang pura bad pynthikna ruh ba kan long kaba ïaid beit ïaid ryntih ha ki liang baroh.
Ym tang kata, ha kane ka jingpynkhreh la dep ban ai jingbthah ruh ba lada ki nongthep vote kim pat ïoh ïa ki EPIC hynrei ki kyrteng ki don ha ka thup ba kin long kiba lah ban jied ïa kino kino ki kyrtong ki lah ban rah da ka Passport, ka Driving Licence, ka Pan Card, ka Passbook ba don bad ka dur ba la ai da ka Bank ne Post Office, ka Schedule Tribe/Caste/OBC, ka kot Pension kaba don bad ka dur kum ki Ex-Servicemen’s’ Pension Book, PPO/Ex-Servicemen’s’ Widow, Dependent Certificate, ka Old Age Pension Order, ka Widow Pension Order, ka Arms License, ka syrnod jong kiba don jingduna ha ka met (Disabilities Certificate), ka MGNREGA Job Card, ka Health Insurance Smart Card, ka School Certificates ba don ïa ka dur, ka Permanent Resident Certificate ba la ai napoh ka District Administration, ka Electricity Bills, ka Aadhaar Card bad ka Service Identity Cards kaba don bad ka dur ba la ai da ka Central/State government/PSUs.
Shuh shuh ha kane ka sngi 19 tarik u Rymphang, 2025 na ka liang ki bor distrik (Election Branch), South West Khasi Hills District ka la ïoh ruh ban phah ïa ki kynhun sha ki Polling Station kiba ïa dei halor ka jingpynkhreh ïa ka sngi thep vote ha ka 21 tarik u Rymphang, 2025 ha kaba mynta ka sngi la dep ban phah ïa ki Sector Officer ryngkat ki Presiding Officer ha ki 11 tylli ki Polling Station kiba dei jong ka Langrin District Council Constituency bad kawei ka Polling Station ha Mawkyrwat District Council Constituency.
