Shillong, Lber, 27: Ka Krishi Vigyan Kendra (KVK) jong ka East Khasi Hills kaba hap hapoh ka tnad Agriculture & Farmers Welfare, Meghalaya bad ka ICAR-ATARI Zone-VII ha ka 26 tarik mynta u bnai ka la pynlong ïa ka jingïalang kaba shisngi ban pynsngewthuh paidbah halor ka Aiñ PPV&FRA, 2001 na ka bynta ki nongrep kiba dei na ki District bapher bapher jong ka jylla ha KVK, East Khasi Hills, 5th Mile Upper Shillong.
Ha kane ka sngi la ïoh ruh ban pynlong ruh ïa ka jingpyni nam ban pyni ïa ki jait jingthung kiba kyrpang ha ka jylla da ka KVK West Khasi Hills, KVK Jaiñtia Hills bad ka KVK Ribhoi, ka Institute of Bioresources & Sustainable Development (IBSD), ka ICAR-Central Potato Research Station nalor kiwei pat.
Ym tang kata, ki stad saïan kiba la shah khot sngewbha na ka bynta ki Technical Session ki kynthup ïa ki saiantis na ka ICAR-NEH, IBSD, ICAR-CPRS bad KVK East Khasi Hills ki la ïasam ïa ki jingshem jong ki halor ki phang bapher bapher ryngkat ka jingpyrkhat kyrpang ïa ka jingpyndonkam, jingpynneh pynsah bad ka jingbuh jingthoh ïa ki jingthaw ba riewspah jong ka jylla.
Shuh shuh, ha kane ka sngi la sam ïa ki mar rep sha ki nongrep jong ka East Khasi Hills District ba la kyrshan da ka ICAR – National Bureau jong ka Agriculturally Important Microorganism (NBAIM), Mau, Uttar Pradesh hapoh ka NEH Component.
Ha kane ka jingïalang ïa ka prokram, u bah B.K. Sohliya, Chairman I/c jong ka Meghalaya Farmers (Empowerment) Commission u la long u kongsan bad ha ka jingkren jong ula pynpaw ïa ka jingdonkam ban pynrung kyrteng ïa ki jait jingthung kiba la rep da ki nongrep ka jylla hapoh ka aiñ PPVFRA bad ai mynsiem ïa ki nongrep bad ïa ki KVK ban ïa trei shitom lang ban ithuh bad pynbiang ïa ki jingthoh kiba ïadei bad kine ki jait jingthung kiba don ha ka jylla.
Ula ban jur ruh ïa ka jingdonkam ban pynshlur ïa ki nongrep jong ki thaiñ nongkyndong sha ka jingseng-kam seng-jam da ka jingmut kaba shai halor ka jingpynwandur ïa ki mar jong ki.
U Dr. A.K. U Mohanty kum u symbud kongsan ha ka jingrken jong u ula ban jur halor ka bynta ba ki KVK ba kin long kita ki tyndong jingshai na ka bynta ban pynphriang ïa ka teknology sha ki nongrep. U la kren halor ka jingdonkam ban pynwandur ïa ki rukom rep bad ri jingri lane kata ka IFS model lyngba ka jingbuh jingmut ïa ka jingpynwandur ïa ki Micro bad Mini IFS Models ha ki KVK bad ka lyngkha jong ki nongrep.
Shuh shuh, u la kdew ba ka ICAR-ATARI ka la ithuh bad seng 2 tylli ki Agri-Incubation Centre ha ka jylla Meghalaya na ka bynta ban btin kti bad ban pynsuk ïa ki nongseng kam ha ki thaiñ nongkyndong. Ha kajuh ka por, ula ïasam ruh ïa ka jingdonkam ban pynwandur ïa ki KVK kum ki jaka test ïa ki jait jingthung ban pynrung kyrteng hapoh ka aiñ PPVFR.
Ha kajuh hi ka sngi, la pyllait paidbah ruh ïa ka kot lyngkdop kaba la ai kyrteng “Khyndiat ki jngtip shaphang ka hok u nongrep hapoh ka aiñ, Protection of Plant Varieties and Farmers’ Rights Act, 2001” kaba la pynmih da ka KVK East Khasi Hills na ka bynta ka jingmyntoi jong ki nongrep.
Nalor u bah B.K. Sohliya, Chairman I/c jong ka Meghalaya Farmers (Empowerment) Commission kum u kongsan, bad u Dr. A.K. Mohanty, Director ka ICAR-ATARI Zone-VII, Umiam kum u symbud kongsan la donlang de kiwei ki riew shemphang jong ka jylla.
