Shillong, Lber 29: U Myntri Rangbah ka jylla u Conrad K. Sangma, ula plie ïa ka Tnad kaba 25 jong ka HDFC Bank ha Tura, West Garo Hills, ha kaba la ïadonlang ka MP barim ka jylla ka Agatha K. Sangma, u Abraham T Sangma u Superintendent of Police ka West Garo Hills, u CEO ka Tura Municipal Board u Rikse R Marak bad u Father Thomas John u Principal jong ka St. Mary’s School.
Haba kren ha ka jingïalang, u Conrad K. Sangma ula ban jur ïa ka jingkongsan ban pynïar ïa ka jingdon ki Bank ha ki thaiñ nongkyndong bad ha ki khapsor jong ka rilum Garo bad u don ïa ka jingngeit kaba skhem ba kane ka tnad kaba thymmai kan noh synniang na ka bynta ban kyntiew ïa ka ïoh ka kot jong ka thaiñ.
U Myntri Rangbah ula pynpaw ruh ïa ka jingdonkam ban don ïa ka lad ban ïoh ïa ka pisa bad u la kyntu ïa ka Bank ba kan plie da ki lad ki ban pynsuk ban ai ram ïa ki nongseng kam la jong, kiba pynïaid ïa ki karkhana rit, ki nongrep bad ïa ki samla.
U la banjur ba ka jingnang jingtip ha kaba ïadei bad ka pisa ka long kaba kongsan bha ka ban pynkupbor ïa ki nongshong shnong ba kin pyndonkam ïa ki lad jingshakri kaba ki ïoh lyngba ka Bank bad ula kyntu ïa ki Bank ba kin ïatreilang bad ka sorkar ban kyntiew ïa ka jingai jingpynshai sha ki jaka kiba don ha kyndong tam bad ula pynthikna ba ka sorkar jylla kan ai ka jingkyrshan kaba pura ban pynbeit ïa ki jingeh kaba mad da ki Bank ha ka jingtreikam hapoh ka jylla.
Na ka liang ka Agatha K. Sangma, ka la ai khublei ïa ka HDFC Bank kaba la plie ïa kane ka tnad treikam kaba thymmai bad ka la pynpaw ïa ka jingkyrmen ba kane kan kyntiew ïa ka jingai jingshakri bad ban plie ïa ka lad ïohkam ïohjam ha ka thaiñ.
Na ka liang u C P Marak- IFS Retd, Executive Chairman ka MBOSE, ula pynpaw ïa ka jingkongsan jong ki jaka ai pisa ne ka ram ban pynthikna ba kan don ka jingshngaiñ ha ka ïoh ka kot bad ula kyntu ïa ki paidbah ba kin pyndonkam ïa ki lad bapher bapher lyngba ka jingdon jong ka Bank ha ki kam sei ne thep pisa ka jong ki ha ki rukom bapher bapher.
U Rikse R Marak, ula pdiang sngewbha ïa ka jingpynïar jingshakri jong ka Bank kaba long ka sienjam ka ban kyntiew ïa ka jingnang jingtip ïa ki paidbah khamtam ïa ki longkmie bad ïa ki samla ka rilum Garo ha kaba ïadei bad ka kam pisa.
Na ka liang u Father Thomas John u la buh jingduwai bad kyrkhu kyrdoh ba ka jingtreikam kane ka tnad ba thymmai jong Bank kan long kaba seisoh ryngkat bad ka kyntu ïa ki bor kiba pynïaid ba kin bat ïa la ka nongrim ha ka jingai jingshakri ïa u paidbah.
Kane ka jingplie ïa ka tnad bathymmai ka long kaba kongsan na ka bynta ban pynkhlaiñ ïa ka rukom treikam jong ki Bank bad ka jinglong jingman ha kaba ïadei bad ka jingpyndonkam ïa ka pisa bad ban pynthikna ba ka jingai jingshakri ki Bank kan poi sha man la ki nongshong shnong kiba donkam ki jingïarap.
