Shillong, Lber 29 : U Nongïalam ka Liang Pyrshah, Bah Titos W Chyne u la pyntip ha Ïing Dorbar ba ka jinglong jingman ha MDC Hostel ka la hiar dor shaba palat pud haduh ba ka la pyndik bad pynwit ïa kiba sah ha ka ïing sah kaba mang kyrpang na bynta ki MDC.
Da kaba ai khublei ïa u Bah Kynjohlang Rangtong uba la shah jied kum u Deputy Chairman ba thymmai ka Ïing Dorbar Thawaiñ jong ka Council, na ka liang u Bah Titos u la kyntu jur ruh ïa u ba un shimkhia bha ïa kane ka bynta na ka bynta ka burom jong ka Ïing.
“Haba wan ki briew na constituency ka long kaba i lehraiñ bha nalor ka jing jaboh, ka jingsma bad ka jingbym bit bym biang. Teng teng kum kine ki jingjia kiba sngewsih kiba ju jia ha katei ka ïing MDC hostel kiba pynjah burom ïa ki dkhot ka ïing namar don ki por ba ki kylla kum ki ktem jong ki kam kiba ngam kwah ban kren ha kane ka Ïing,” u la ong.
U Bah Titos u la ïathuh ruh ba don ki briew kiba pynlong ïa kane ka MDC Hostel kum ka jaka shongkai bad ka ktem ban leh ïa ki kam bym sngewtynnad. U ong ruh ba ki bahaïing ha sem jong ki MDC ba sah hangtei ki ju ujor ba teng teng ki ju don ki jingshah pynthut mynmiet teng teng na ka jinghylla, ka jingpynheh tape bad ki jingkhawai party ba harukom.
“Nga kyrpad ïa phi Shongknor lada ka long kaba lah ba u Symbud Shongknor ba un ïoh ban peit bha ïa kane ka bynta kaba long kawei na ki bynta jong ka Legislative Wing,” u la bynrap biang.
Ha kajuh ka por u la ong ba ki don ka jingngeit ba ha ka jingpynïaid jong u ïa ka Ïing kan long kumjuh kumba pynïaid u Shongknor ba pura khlem da shah lïang ïano ïano da kaba ailad ïa baroh ban ïa kren na ka bynta ka jingbit jingbiang jong ki constituency bad khamtam na ka bynta ka ri bad ka Jaidbynriew.
