Shillong, Lber 28: Ka Khasi Hills Autonomous District Council (KHADC) ka la mynjur ïa ka vote on account na ka bynta lai bnai kaba dei naduh u ïaïong haduh u bnai Jylliew 2025, ha kaba ka jingmang pisa ka long T. 35,44,55,600, ha ka sngi ba kut jong ka dorbar mang tyngka ha ka sngi Thohdieng.
U Executive Member u ba khmih ïa ka tnat Finance, u Bah Seiborlang Warbah u la wanrah ïa ka vote on account ka ban treikam naduh 1 tarik u ïaïong haduh ka 30 tarik jong u bnai Jylliew ha kane ka snem.
U la ong ba kane ka vote on account kan ai lad ïa ki tnat ba kin lah ban pyntyllun ïa ki kam ha kane ka por kaba dei ban kut ha ka 30 tarik u bnai Jylliew.
Kane ka vote on account ka thmu ruh ban ai lad ban siew ïa ki tulop ïa ki dkhot ka ïing, chairman, deputy chairman, u nongïalam ka liang pyrshah, ki executive member, ki officer bad ki nongtrei ha ki tnat bapher bapher (executive, legislative bad judicial).
Haba jubab ha ka general discussion, u Bah Warbah u la ong ba ka executive committee (EC) kan pyrshang la ka bor ban wad ki lad ki lynti ban kyntiew ïa ka jingïoh lum khajna.
Na ka liang jong u, u la ong ba ka Executive Committee ka la pyrshang katba lah ban kiar na ki jingpynlut pathar ïa ka pisa jong ka council.
