Shillong, Lber 28: Ka Khasi Hills Autonomous District Council ka pynpaw ïa ka jingsngewsih kaba khraw halor ka jingkhlad noh jong u Bah W Mathew Mawdkhap bad ka sngewdei ban buh ïa ka jingthoh sah kynmaw halor ka jingduh noh ïa uwei u nongmihkhmat barim jong ka Council. Ka Council ka phah ruh ïa kane kyrwoh sngewlem sha i kurim i kong W Kynta, ki khun ki kti bad sha baroh kiba haïing hasem kiba la kynduh ïa kane ka jingjia kaba sngewsih.
Katkum ka jingtip u Bah W Mathew u la khlad noh na kane ka pyrthei ha ka 22 tarik u Lber 2025. U la shah jied kum u nongmihkhmat sha ka KHADC na ka 13 Sohra Constituency ha ka snem 1979-1983.
Kum u nongmihkhmat jong ka ïing u la nohsynniang shibun na ka bynta ka roi ka par, ka bha ka miat bad ka jingmyntoi ka constituency bad kumjuh ruh ïa ka Council. Ha kajuh ka por u la long teng kum u wei na ki Myntri ka Hima Sohra haduh ka khyllipmat kaba khatduh bad ka jingkhlad noh jong u, ka la long ka jingduh kaba khraw bad ka jingsngew thylli, ong ka kyrwoh ba la phah da u CEM ka KHADC u Bah Shemborlang Rynjah.
