Shillong, Lber 29: U Myntri Rangbah ka Meghalaya u Conrad K. Sangma u la pyntip ba ka sorkar ka don ïa ka jingthmu ban wanrah ïa ka project ka ban pynïasoh ïa ki katto katne ki shnong ba jngai da ki jingkieng doi doi.
“Ki don bun tylli ki Shnong, kiba la phiah da ki wah. Ka Sorkar ka la pynwandur ïa ka project, kaba la bei tyngka da ka World Bank, ka ban pynïasoh ïa ki shnong hapoh ka Jylla, ha kaba yn pyntrei ïa ki jingkieng doidoi,” ong u Myntri Rangbah haba plie ïa ka jingkieng doidoi ha Dombagre, kaba hap hapoh Dalu Block, West Garo Hills.
Kane ka jingkieng ba 80 meter ka jingjrong ba la shna halor ka wah Bandra, ka dei kaba pynïasoh ïa ka surok Sesengpara Kherapara sha ka shnong Dombagre bad kan ai jingmyntoi ïa palat 2000 ngut ki briew.
La ong ba ïa kane ka jingkieng la tei ha ka jinglut kaba kot T. 2.08 klur. La wanrah ïa ka hadien ba ka jingkieng dieng ka la jot bad shah rong noh ha ka jingshlei um ba jia ha u snem 2022 ha ka thaiñ Dalu.
“Kane ka jingkieng ka la khate ïa ka jingjngai ban ïaid kjat da 11 Km,” ula ong haba pynpaw ba kane ka jingkieng doi doi kan ai jingmyntoi shibun eh ïa ki paidbah.
U la shim ruh ïa ka kabu ban pyntip sha ki paidbah ba katba kane ka jingkieng doidoi ka dei ka lynti ba shipor ïa ka shnong, ka Sorkar kan sa wanrah shen ïa ka project ban tei syndon da ka jingkieng maw. U la pyntip ruh ba ka Sorkar ka don jingthmu ban pynthikna ïa ka roi ka san ba pura hapoh ka Jylla.
Ha ka jingleit ïuh kjat ha Dalu, u Myntri Rangbah ula ïakynduh ruh ïa ki doktor bad ki nonghikai jong ki jaka pule bapher bapher kiba hapoh hapoh ka Dalu Block bad sngap ïa ka jingsngewkhia ba ki don ban pynpaw. Ki sengbhalang bad ki paidbah ruh ki la aiti ïa ki dorkhas ban pynbha ïa ka CHC, PHC ha ka thaiñ kynthup ka jingkyrpad ban pynïeng ïa ki mobile tower.
U Myntri Rangbah u la sngap ruh ïa ka jingsngewkhia ba la pynsngew da ki paidbah ha kane ka prokram, kaba long shibynta jong ka CM-Connect, ka flagship prokram jong u Myntri Rangbah ban sngap bad ban weng ïa ki jingeh jong ki paidbah.
