Shillong, Lber 29: Ka Watershed Yatra kaba la pynlong hapoh jong ka Pradhan Mantri Krishi Sinchayee Yojana (PMKSY) Watershed Development Component (WDC) 2.0, la pynlong ha ka sngi saitjaiñ ha ka shnong Mawan kaba hap ha ka Mylliem C&RD Block, East Khasi Hills.
La ong ba ka jingthmu jong kane ka prokram, ka long ban kyntiew ïa ka rukom pyndonkam ïa ka um bad ban pynneh ïa ka khyndew ryngkat ka jingpynshlur ïa ki shnong ki thaw ban ïashimbynta lang ha ka sienjam ban pynneh pynsah ïa ki tyllong um.
U Nongaibuit jong u Myntri Rangbah ka jylla u Bah Hamletson Dohling, ula plie ïa ka jaka kaba la shna bha kaba mih ka umpohliew ban pynneh pynsah ïa ka um ha katei ka thaiñ bad ula kren ruh shaphang ka Watershed Programme bad ki jingmyntoi kiba ïoh na ka bad ula pyntip ba ka Sorkar India bad ka Sorkar Jylla kila trei shitom ban pyntreikam thikna ïa kane ka projek.
Na ka liang jong u, u la pynpaw ruh ba u don ïa ka jingkyrmen kaba skhem ba lyngba kane ka prokram, ki paidbah kila ïoh ïa ki jingpynshai ban ïada ïa ka mei mariang bad ban pynsaphriang lem ïa kitei ki jingtip sha kiwei bad ula kyntu ruh ïa ka sorkar jylla ban ïatreilang bad baroh kiba donbynta lang, ban ïada ïa ka mei mariang bad ïa ki jingdon jingem ki jong ka.
Ha kane ka prokram la ïadonlang u Bah Tosanbha Marwein u Block Development Officer ka Mylliem, u Bah W.K. Kharkongor u Divisional Soil & Water Conservation Officer ka Shillong Territorial Division, u Bah N. Khongwir Senior AS&WC Officer jong ka Shillong Territorial Division bad ki ophisar na kiwei kiwei ki tnad, ki nongmihkhmat na ki jaka pule bad ki khynnah pule.
Hadien kane, ki nongïashimbynta ki la ïashimbynta lang ha ka ban thung ïa ki dieng, kaba pyni ïa ka jingïengskhem ban pynneh pynsah ïa ka mei mariang bad la sam ruh ïa ki syrnot sha ki kynhun bad ki riewshimet kiba shimkhia ban ïada bad pynneh pynsah ïa ki um bad ki tyllong um.
Ïa kane ka Watershed Yatra la dep ban pynlong ha North Garo Hills, East Garo Hills, West Garo Hills, South West Garo Hills, South Garo Hills, West Khasi Hills, Eastern West Khasi Hills, South West Khasi Hills bad East Khasi Hills bad mynta yn ïai bteng ban pynlong sa ha West Jaiñtia Hills, East Jaiñtia Hills bad ha Ri Bhoi district.
