Nongpoh, Lber, 14: Kum shi bynta ban ai ka jingpynshai kaba bñiah halor ki kyndon bad ki aiñ ñiah kali ban shngaiñ ki surok bad ka leit ka wan ki paidbah khamtam ban ïada na ki jingmynsaw bad ki jingjia ba sngewsih ha surok bah, ka tnad pulit jong ka Ri-Bhoi mynta ka sngi ka la pynlong da ka prokram pynshai paidbah sha ki nongñiah kali kamai bala pynlong ha Umsning Town Dorbar Hall.
Ha katei ka prokram la wan ruh ban shim bynta palat 100 ngut ki nongñiah kali kamai na ka thaiñ Umsning bala sakhi ruh da ka jingdonlang u Bah Rocky Kylla Chairman ka Umsning Town Dorbar.
Ïa katei ka prokram ba la ai jinghikai halor ka jingshngaiñ ha surok, la wan ban pynshai paidbah da u Bah PS Marweiñ, DSP Crime ka Ri-Bhoi District bad u Bah Ellias Marak OC Umsning Police Station.
Kumba ka paw, lyngba katei ka prokram ka la long shisha ka jingkyrkhu ïa ki nongñiah kali khamtam kiba kamai man ka sngi kumno ban bud ryntih ïa ki kyndon aiñ ban lait na ka kuna bad khamtam ki jingjia ba sngewsih kumba ha kine ki khyndiat sngi la sakhi ruh ba ka Ri-Bhoi District kadei kawei na ki jaka ba jur bha ka aksiden kali kaba la shim ruh bun ki mynsiem briew tang na ka jingñiah khlem akor bad ka jingbym burom ïa ki aiñ bad ki kyndon ñiah kali.
Ha kawei pat ka prokram, u Bah PS Marweiñ DSP Crime bad ka kong Susana Ryngksai na Nongpoh Women PS ki la leit ban pynshai paidbah halor ka jingma na ka jingkyrni jong u drok bad kumjuh ruh ka aiñ POCSO bala pynlong da ka Mawkhan VHC bad Mawkhan RWWA ha madan phutbol ka shnong Mawleiñ Mawkhan.
Ha kane ka prokram ka jinghikai, la wan ban shim bynta palat 500 ngut ki paidbah kiba la wan ban sngap ha katei ka jingpynshai kaba la ai jingmyntoi ïa ki paidbah katei ka shnong ba kin tip ïa ka aiñ shongkha shongman katba kim pat dap pura ka rta ban shong kurim kumba la buh da ka sorkar namar kane kan ïalam ïa ki sha ka jingjynjar katkum ka POCSO Act watla ka dei da ka jingiaïeid samla.
Na ka liang ka tnad pulit ka la kyrpad ruh ïa ki paidbah khamtam ki khun samla ban kiar na ka shongkha khynnah, ban phet lai lum lai wah bad ong em ïa u drok u la ba pynjot ïa ka jingim jong kiba bun ki khun samla kiba dang don hapdeng ka lynti ban ïoh ïa ka lawei ba phyrnai.
