Shillong, Lber, 30 : Ka ophis jong ka Central Bureau of Communication, Field Office, Nongstoin hapoh ka tnat Information & Broadcasting, Sorkar India ka la pynlong ïa ka prokram ai jingtip halor ka Systematic Voter’s Educationa & Electoral Participations (SVEEP) hynnin ka sngi ha Nongstoin Kolej, ha ka jingïatreilang bad ka tnat Election, Ophis jong u Deputy Commissioner, Sorkar Meghalaya, West Khasi Hills Distrik.
U kongsan, Bah H. Kerwood Thabah, ADC, West Khasi Hills u la ong ba ka jingai jingtip ïa ki nongjied nongmihkhmat bad ka jingïashim bynta jong ki ha kane ka kam jied nongmihkhmat ka long kaba kongsan ha ka synshar paidbah bad u la ong ba ka long kaba donkam bha ban sngewthuh ïa ka jingkordor jong ka jingïashim bynta ha ka jingjied nongmihkhmat, khamtam da ki samla. U la kyntu ruh ïa baroh ba kin ïashim bynta ha kane ka elekshon ka ban long ha ka 19 tarik u Ïaiong ha Meghalaya.
U Resource Person, Bah P T Blah, Deputy Labour Commissioner uba dei u nongai jinghikai jong ka Tnat Elekshon WKHD, Nongstoin, u la pyni ïa ka rukom treikam ka kor EVM bad ka kor VVPAT. U la batai ïa ki briew shaphang ka rukom ïashim bynta kaba khuid bad ka jingpyndonkam ïa ka teknoloji kum ki kor Electronic Voting Machine (EVM) bad ki kor Voter-Verified Paper Audit Trail (VVPAT). La pynlong ruh ïa ka jingïakop quiz halor kane ka phang ha kane ka sngi. La pynlong ruh ïa ki jingïakhun thoh slogan bad ki jingïakhun ai jingkren halor kane ka phang. La sam ruh ïa ki certificate bad song tyngka sha ki nongjop.
Ka Kong Delicia Jyrwa, Field Publicity Asst, CBC Nongstoin ka la pynkut ïa ka jingïalang da ka jingkren ai jingkhublei.
