Pynim biang ka Raid Nongpoh hadien 20 snem ïa ka Shad Sajer ha Lum Wortoh ka jaka kyntang ka Raid

Nongpoh, Lber 30 : Da ka jingthmu ban dang pynneh pynsah ïa ka riti ka dustur bad ïa ka niam ka rukom tynrai ka Raid Nongpoh ba hap ha ka Elaka Nongpoh Sirdarship, ka Raid Nongpoh mynta ka sngi ka la pynim biang ïa kawei na ka lehniam tynrai ba la tip ku ka shad Sajer ha u lum Wortoh ba dei ka jaka kyntang ba ju leh ïa ka kñia ka khriam naduh ki longshuwa ki man shuwa.
Ïa kane ka lehniam Shad Sajer ka Raid Nongpoh la wan ban shim bynta da u Commissioner Secretary ka tnad Arts and Culture ka sorkar Meghalaya, u Bah Fedrict Kharkongor kum u kongsan bad ka Editor ka Kot Khubor Shillong Times ka Kong Patricia Mukhim kum ka symbut kongsan.
Nalor ki khun ki hajar ka Raid Nongpoh, la pynphuh pynphieng ruh ïa kane ka lehniam shad Sajer da ka jingdon lang u Lyngdoh ka Raid Nongpoh u Bah Linus Lyngdoh, u Lyngdoh ka Raid Nonglyngdoh, u Bah S. Lyngdoh, u Secretary ka Nongpoh Town Committee u Bah Rayonald Kharkamni, ki nongïalam seng bhalang na KSU, RBYF bad HNYF bad kynthup ruh ki longsan ki mansan bad ki riew rangbah na ka them Ri Bhoi.
Lyngba jong kane ka sngi, ka Raid Nongpoh wat la kam ju pynlong shuh ïa kane ka lehniam Shad Sajer la 2o snem kynthih, hynrei ki rang bad ki thei na ka Raid Nongpoh bad na kiwei ki raid ba hap ha ka Elaka Nongpoh Sirdarship ki la mih madan ban pynpaw pyrthei ïa ki jingshad tynrai, ka put ka tem bad ka rwai ka siang ba long tynrai shi bynta ban pynim biang ïa kane ka lehniam Shad Sajer ka Raid Nongpoh.
Haba ai jingkren ha kane ka sngi kum u kongsan, u Bah Fedrict Kharkongor u la ai khublei kyrpang ïa ka Raid Nongpoh kaba la lah ban shim biang ïa kane ka sien jam ban pynim biang ïa kane ka shad Sajer kaba long shi bynta ban pyneh pynsah ïa ka riti ka dustur bad ka jinglong kyrpang ki khun ki hajar ha ka riti ka dustur kaba ngi donkam ban pynneh pynsah khanng ban nym ïap ka jaid bynriew.
U la ong ruh ba ka tnad Arts and Culture jong ka sorkar jylla ka pyrshang ban plie lad plie lynti da ki lad jingïarap bapher bapher sha ki shnong ki thaw, ki Raid ki hima na ka bynta ban pynneh pynsah ïa ki riti ki dustur namar kum ka jaid bynriew ka donkam ban don la ka riti ka dustur kaba long ka jingïada ïa ka jaid bynriew jongngi.
“Ka jingpynlong ïa kane ka Shad Sajer kam dei ruh tang ba ki rang bad ki thei ki ioh lad ban pynpaw pyrthei ïa ki riti ki dustur lyngba ka put ka tem ka shad ka mastih, hynrei haba ngi pynlong ïa akne ka rynsan ka long ruh ba ngi pynim ïa la ka riti ka dustur jongngi” ong u Bah Kharkongor bad bynrap ruh da kabba ong ba ka tnad Art and Culture ruh kan dang ïai ai ka jingkyrshan ïa ka Raid Nongpoh ba ha ki snem ban sa wan ka jingpynlong ïa kane ka Shad Sajer ka long kaba phuh ba phieng bad kaba ai jingmyntoi ruh ïa ngi ban gin lah ban pynneh pynsah ïa ki riti ki dustur” u la bynrap.
Shuh shuh, u la pynpaw ruh da kaba ong ba ka UNESCO ruh ka ju ai ki jingïarap ba kyrpang na ka bynta ban pynneh pynsah sha ki jaid bynriew bapher bapher hapoh ka pyrthei bad ka daw hi ka long ba ka kwah ban pynnah pynsah ïa kiti ki riti ka dustur la ka long na kano kano ka jaid bynriew hapoh ka pyrthei.
Na ka liang ka Kong Patricia Mukhim Editor ka Shillong Times haba kren ha kane ka sngi ka la I khublei kyrpang ïa ka Raid Nongpoh ba ka la pynlong ïa kane ka Shad Sajer ba la pynim biang hadien 20 snem bad ka la ong ruh ka jingpynlong ïa kane ka shad Sajer ka dei shi bynta ban pynneh pynsah ïa ki riti ki dustur bad lada ngi kwah shisha ban pyneh ïa ki riti ki dustur ngi donkam ruh ban buh da ki jingthoh jingtar khnang pateng la pateng ka riti ka dustur jongngi kan im kan sah, ka la bynrap.