Nongpoh, Lber 30 : Kum ka jingangnud ban ai ka jingsumar na ka bynta kiba pang kiba shitom hapoh ka jylla bad wat kiwei ki jylla shatei Lam Mihngi ka ri India, ki bor pynïaid jong ka ARHI Multi Super Specialty Hospital mynta ka sngi ki la plie paidbah noh ïa katei jaka ai jingsumar kaba don ha ka Shnong Mawsmai kaba ha khappud Meghalaya bad ka Assam.
Ha kane ka sienjam la plie ïa katei ka jaka ai jingsumar da u Bah A.L Hek, uba dei u Myntri sorkar ka Meghalaya kaba dang dei tang ha ka OPC Block bad ruh ba la wan ban sakhi lang da u MLA ka Jirang u Bah Sosthenes Sohtun, u Dr. Aman War, DHS barim ka tnad ka koit ka khiah, u Rangbah Shnong ka Mawsmai bad ryngkat kiwei kiwei ki riew rangbah bad ki nongshong shnong katei ka shnong Mawsmai.
Kum ban pynpaw paidbah, kane ka ARHI Multi Super Specialty Hospital yn pynïaid bad khlieh duh da u Bah A.L Hek ryngkat ka jingdon lang u Aibansharai Nongsiej, u Dr. Mahamaya Prasad Singh, Dr. Sandeep Rai Das, u Dr. Jadunarh Burogohain, u Dr. Rubaiya Anam, u Dr. Simranjeet Singh, u Dr. Firoz Ahmed, u Kamal Goyal, u Parag Chutiya.
Haba plie ruh ïa kane ka jaka ai jingsumar la wan ban ai ka jingkyrkhu kyrdoh bad kyrkhu kyrpang ïa kane ka jaka ai jingsumar kaba don 200 jingthiah da u Fr. Kmenlang Nongrum parish priest ka Byrnihat Parish uba la ai ka jingkyrkhu kyrdoh ryngkat ka jingduwai ba kyrpang ba kane ka jaka ai jingsumar kan ai shisha ka jingshakri na ka bynta kiba pang ba shitom hapoh ka jylla bad kiwei kiwei ki jylla ba marjan.
Haba kren ha kane ka sngi kum u kongsan, u Bah A.L Hek u la pynpaw ïa ka jingkmen ba la lah ban plie ïa kane ka jaka ai jingsumar bad khamtam ba ka jingthmu ban pynïar ïa ka jingshakri na ka bynta kiba pang ba shitom ka la dang urlong kumba u don kata ka mynsiem ban shakri na ka bynta ka imlang ka sahlang.
U la ong ruh ba ïa mynta ka dang don tang haduh 200 jingthiah nalor kiwei kiwei ki lad ai jingsumar sha kiba pang ba shitom bad u khmih lynti ruh ba lyngba ki bor pynïaid ki dang pynjanai ïa ka jingshakri ba kane ka jaka ai jingsumar kan ai ka jingshakri kaba bha tam ha ka pang ak shitom ym tang ha ka jylla Meghalaya bad nak ki jylla shatei lam mihngi ka ri India ba ki angnud ban kane ka jaka ai jingsumar kan long kawei na ka jaka ai jingsumar kaba paw bad kaba biang tam ha ki jylla shatei lam mihngi ka ri India. Shuh shuh, u Bah A.L Hek u la ai khublei kyrpang ruh ïa baroh ki nongtrei hapoh kane ka jaka ai jingsumar bad kyntu ruh ba kin dei ban don ïa ka mynsiem ban shakri hok na ka bynta kiba pang ba shitom, namar ka jingthmu jong u ka long ba ka jingdon kane ka ka jaka ai jingsumar kan long shisha ka jingkyrkhu na ka bynta kiba pang ba shitom ba kin ioh shisha ïa kata ka jingsumar kaba paka tam ha ka pang ka shitom, u la bynrap.
