Jowai, Lber 30 : Ka Kiang Nangbah Government College Student’s Union (KNGCSU) Jowai ha ka sngi Ba lang ka la ïakynduh ïa u Symbud Myntri Rangbah ka jylla u Bah Sniawbhalang Dhar ban pynkynmaw biang ïa ki mat jingdawa kiba ka Union ka ladep ban pynsngew sha ka Sorkar ha kaba ïadei bad ki jingdonkam kyrkieh jong ka College.
U President ka Union, samla Evermore Rymbai ka jingïakren bad u nongthoh khubor ula ong ba ka Union ka la aiti ïa ka dorkhas ha u Symbud Myntri Rangbah tang kum ka jingpynkymmaw ïa ki mat jingdawa kiba ka Union ka ladep ban pynsngew naduh ka 2 tarik mynta u bnai.
Ki mat jingdawa kiba ka KNGCSU ka la buh hakhmat eh ki long halor ka jing dawa buh ïa ki Security Guard ha ki Hostel jong ka College,, ban don ïa ki jaiñ ‘Personalized Graduation Gowns’ kiba pyndonkam ha sngi ba la pynkup burom ïa ki samla pule ne Graduation Day namarba bunsien ki samla pule ki hap ban siew da ka pisa bad kane kam sngew ïahap satia ïa ki nongïalam ka Union.
Ka Union ka la dawa ban don ïa ki Lecturer ha ka Subject Khasi namrba haduh mynta ka College kam don nonghikai ha ka sobjek Khasi bad kane kaba la buh jingeh ïa ki samla pule khamtam ïa kito ki samla pule kiba shim Major ha ka Subject Khasi.
Ka Union ka la dawa ban don ïa ki kot ki sla kiba katkum ka juk ba mynta hapoh ka Library jong ka College, naduh ki por mynshwa haduh mynta ki kot hapoh Library ki dei ki juh beit khlem don jingkylla, la ong utei u President.
Nalor kine ki hangne, ka Union ka la dawa ban pynheh ïa ka Boys’ Hostel jong ki Shynrang kaba pdiang tang kumba 25 ngut ki samla pule shynrang. Kumba long mynta ki samla pule jong ka College ki don haduh 3,618 ngut bad ki shynrang ki don mar shiteng bad kane ka la dawa eh ïa kito ki samla shynrang kiba wan pule na ki shnong kiba jngai.
U samla Rymbai u la ong hadien ha ka jingïakren bad u Symbud Myntri Rangbah ula pynsngew ba ïa kine ki kam kiba ka College ka dawa ki la ïaid shakhmat mynta bad ka Sorkar ka dang ap ban kut shwa ka Election MP 2024.
Shuh shuh u la ong kum ka Union ki la pyrshang ban wanrah ïa ki kam pynroi hapoh ka College bad mynta ka kynti ka College ka la ïoh ïa ki lynti ïaid kjat ha ki bynta jong ka College bad ka jingpyni tynnad ïa ka phyllaw jong ka College ha kaba ka kam ka dang ïaid shakhmat ha ka jingtrei bad mynta sa ka jingai rong ïa ka College yn sa leh noh da ka jingkular lang jong u MLA ka Jowai Constituency Bah Wailadmiki Shylla.
