Pynsngew ka RBDSA sha u Bah Shakliar, halor ka jingpynkhreh ïa ka rakhe Jubilee Ksiar ha Ri Bhoi

Nongpoh, Naitung 02: Ka Ri Bhoi District Sport Association (RBDSA) kum ba ka la ïaid shaphrang ban pynkhreh ïa ka jingrakhe ïa ka Jubili ksiar, ka jingdap 50 snem ba la ïaid lynti ka RBDSA ha kaba kyntiew ïa ki kam ïalehkai sport, kane ka seng ka la leit ban ïa kynduh ïa u MLA ka Nongpoh, u Bah Mayral Born Syiem bad ruh ïa u Myntri ka tnad sport, u Bah Shakliar Wajri na ka bynta ban pynsngew halor shibun ki jingdonkam ha kaba pynkhreh ïa kane ka jingrakhe dap 50 snem ka RBDSA.
Ha kane ka jingleit kynduh ïa u MLA bad ïa u myntri ka tnad Sport la ïalam da u Bah R.B Shadap bad ka kynhun, ha kaba ki la ioh lad ban aiti ruh ban aiti ïa ka dorkhas na ka bynta ban pynpaw halor shibun ki jingdonkam ban pynkhreh ïa kane ka jingrakhe dap 50 snem ka RBDSA ha Ri Bhoi District.
Haba kren sha ki lad pathai khubor, u Bah R.B Shadap, President ka RBDSA, u la pynpaw ïa ka jingkhublei kaba kyrpang ïa u MLA ka Nongpoh, uba la sngap ïa kane ka kynhun bad ruh uba la don bynta lang ban leit synran ha kaba kynduh ïa u myntri ka tnad sport, u Bah Shakliar Warjri.
U Bah R.B Shadap u la ïathuh ruh ba ha ka jingïakynduh ïa u Myntri ka tnad sport, u Bah Shakliar Warji, u la pynpaw ïa ka jingsngewkmen ïa kiei ki mat ba la pynpaw da ka RBDSA bad khamtam ka jingpynkhreh ha kaba rakhe ïa kane ka jubili ksiar, ka jingïaid lynti ba 50 snem ka RBDSA ha Ri Bhoi.
U la ong ruh kaba sngewkmen ïa ka RBDSA, ka dei ka jingkular u Myntri ba ka sorkar kan don ryngkat lang bad ka RBDSA ha kaba rakhe ïa kane ka jubili ksiar bad u kyrmen skhem ruh ba ka sorkar lyngba ka tnad sport kan ïarap ïa ka RBDSA halor shibun ki jingduna na ka bynta ban rakhe ïa katei ka sngi kyrpang ka jingïaid lynti ba 50 snem ka seng ha Ri Bhoi.
Shuh shuh, u Bah R.B Shadap, u la ïathuh ruh ba kane kaj ingrakhe dap 50 snem ka RBDSA shen kan sdang noh ha u bnai Naitung 2024 bad kin sa pynkut pat ha u bnai Risaw 2024. U la pynpaw ruh ba ka RBDSA kan sa leit ruh ban ïa kynduh ïa u Myntri rangbah ka jylla, u Conrad K. Sangma na ka bynta ban pysngew ïa u, halor kane ka jingthmu ka RBDSA na ka bynta ban rakhe ïa ka jubili ksiar, u la bynrap.