Shillong, Naitung 02: Ka Umiew Maw U Sam bad ka Nongthymmai Raitnongkynrih SC ki la ïoh ban khur jingjop ha ki jingïakhun hynne ka Sngi jong ka lympung SSA Fourth Division 2024, ha Polo, katba ka Mawnianglah Youth SC bad ka Mawpdang SC ki la ïasam mar shi point naba ïakhaid.
Ka jingïakhun kaba nyngkong ha ka por 1:45 baje mynsngi ba la long ha madan lehkai SSA, la sakhi ba ka Umiew Maw U Sam ka la jop salit da shi kol ïa ka New Challenger SC ban khur pura ïa ki lai point ba kongsan. ïa kane ka namtam la thep da u Emmanuel Rongrin ha ka 70 minit.
Kawei ka jingïakhun kaba la long ha ka por 4 baje ha madan SSA, la sakhi ïa ka Nongthymmai Raitnongkynrih SC kaba la pynliem noh ïa ka Mawlynrei SC da 2-1 kol.
Dei ka Mawlynrei SC kaba la lamkhmat nyngkong ïa ka jingïalehkai lyngba ka kol u Winestjune Dohling hadien lai minit ba la ïaid ka por jong ka kylla step.
Hynrei ka Nongthymmai Raitnongkynrih SC ka la jubab da kaba pynïakhaid lyngba u Nicolson Wankhar ha ka minit ba 10 shuwa ba u Iaikyrmenskhem Shynret – un thep ïa ka namtam ban pynjop ha ka 14 minit.
Nangta ka jingïakhun kaba la pynlehkai ha kajuh ka por (4 baje nohphaisngi) ha MFA Ground, la sakhi ba ka Mawnianglah Youth SC bad ka Mawpdang SC ki la ïasam mar shi point naba ïakhaid khlem don mano mano ba pynkhihjar.
Mynta ka sngi, kin don lai tylli ki jingïakhun, ka jingïalehkai ba nyngkong – 1:45 baje mynsngi ha SSA Groundkan long hapdeng ka Laitkroh SC pyrshah ïa ka Pynthorbah SC, nangta bud sa ki jingïalehkai ha ka por – 4 baje ha SSA Ground, hapdeng ka Laitlulong SC pyrshah ïa ka Mawklot SC, katba ha MFA Ground ka Laitumkhrah SC pyrshah ïa ka Lumkseh SC
