Pynskhem ka Meghalaya ïa ka jingkiew ha ka Pencak Silat da kaba wan ba-ar ha ka 14th Senior National Championship 2026

Shillong, Naitung 09: Watla ka Nagaland ka la ïohrah ïa ka nam lahduh ne ka ‘Overall Champions’ jong ka lympung ‘14th Senior National Pencak Silat Championship 2026’ pynban dei ka Meghalaya kaba la kmen kham bun hadien ba ka la pyndep ha ka kyrdan ba ar watla ka hap ban aireng pyrshah ïa ki kynhun kiba kham tbit.
Ka Nagaland ka la khur ïa ka kyrdan ba nyngkong da kaba jop 6 tylli ki takma ksiar, 2 tylli ki rupa bad kawei ka rnong ban tam ïa ka Meghalaya kaba la jop 4 tylli ki takma ksiar, 2 tylli ki rupa bad 6 tylli ki rnong. Ka All India Police Sports Control Board ka la pyndep ha ka kyrdan ba lai da kaba khur 4 tylli ki takma ksiar, 2 tylli ki takma rupa bad kawei ka takma rnong.
Kane ka dei ka jingjop kaba ar kaba khraw jong ka Meghalaya Pencak Silat Association (MPSA) kaba dang shu sdang. Ha u bnai Lber mynta u snem ki la rah ïa ka nam ‘Overall Champion’ ha ka ‘Senior National Khelo India ASMITA Pencak Silat League 2025-26’ na ka bynta ki kynthei.
Kane ka lympung ba mynta kaba lai sngi lynter, ka la long ha Sports Authority of India (SAI), ha NEHU, ha kaba kumba 1,500 ngut ki nongïalehkai martial artist na ki 36 tylli ki jylla kynthup ruh ki sports board, ki la ïashim bynta ha ka kyrdan ïakop jong ka artistic (seni) bad combat (tanding). ïa kane ka lympung la pynlong da ka Indian Pencak Silat Federation (IPSF) ryngkat ka jingïatreilang bad ka MPSA.
Ka Pencak silat ka dei ka jait jingïalehkai ‘martial art’ jong ka ri Indonesia kaba don bynta ha ka Asian Games bad ka don jingkyrmen ruh ba kan shah kynthup ha ka 39th National Games, ba ka Meghalaya kan pynlong ha u snem ban wan.
Ha ka sngi pynhap pyrda la wan kongsan da u bah Mayralborn Syiem MLA ka Nongpoh bad u Chairman ka Meghalaya State Health Advisory Board, uba la pynpaw ïa ka jingangnud ban ïohi ïa kane ka jait jingïalehkai ban shah kynthup lang ha ka National Games.
Ki nongïalehkai ka Meghalaya kiba la khur takma ksiar ki long ka Banrilang Muktieh (tanding -65kg- kynthei), u Tobias Klein (seni ganda- shynrang), u Philip Khymdeit (seni ganda- shynrang) bad ka Rimchi Sangma (seni tunggal- kynthei).
Baroh kiwei pat ki takma jong ka jylla kidei ba la khur ha ka tanding. Ki arngut ba la khur takma rupa ki long ka Viviana Mallai (-70kg kynthei) bad u Tapash Rabha (-85kg shynrang), katba kiba la jop takma rnong ki long ka Khamtimon Rympei (-80kg kynthei), ka Domonika Syiem (-60kg kynthei), ka Iohdahun Klein (-55kg kynthei), u Anthony Shadap (-55kg shynrang), u Sundayrius Khymdeit (-60kg shynrang) bad u Moon Moon Rabha (-70kg shynrang).
ïa ka kynhun ïalehkai jong ka Meghalaya la ïalam da u Thomas Rangthaluh kum u coach bad u Balamlang Khriam kum u Manager.
Da ka jingseisoh kaba la bud ar sien lynter, ka Meghalaya ka la kiew sha ka kyrdan ba ha khlieh duh jong ka ri haba ïadei bad ka jingïalehkai Pencak silat, kaba long kawei pat ka sienjam kaba kongsan katba ka jylla ka dang ïakhun ban kylla long ka jylla kaba khraw ha kiba bun jait ki jingïalehkai.
Da ka jingtrei shitom jong ka MPSA, ki coach bad ki nongïalehkai ka la sei ïa u soh bad da ka jingaiti bad jingkyrshan kaba pura naki nongshim bynta, kan ym slem ïa ka jylla ban ïoh khur takma ha ki rynsan ïakop bar ri (International).