Nongpoh, Nailar 28: Hadien ba ka samoi treikam jong ki nongïalam barim ka Khasi Students’ union Raid Nongtung Circle kala kut noh ka KSU, NKHD Unit ha ka sngi Saitjaiñ ka la ioh ban pynskhem bad pynthymmai biang ïa ki nongkitkam na ka bynta ka samoi treikam 2022-2025 kaba la pynlong ha ïingdorbar Kyndewso.
Ha kane ka sngi la ïadon ryngkat naduh u Vice President ka KSU Sengkmie u samla Biangbor L. Paliar, samla Pynshaiborlang Rani Publicity secretary, u Assistant general secretary samla Ready stone Nongrum, samla Ferdynald kharkamni President NKHD Unit, samla James H Mawphniang General secretary NKHD Unit , u samla Lambok Rymbai Vice President NKHD Unit, u samla Lester Nongbet organising secretary NKHD Unit, U Paiem Miwel Shadap, Syiem ka Raid Nongtung, u President synjuk ki Rangbah shnong Raid Nongtung Bah Blickstar sohtun, lem bad ki dkhot ka KSU NKHD Unit bad ki dkhot ka KSU Raid Nongtung Circle .
Haba ai jingkren ha kane ka jingïalang pynskhem ïaki nongkitkam ka Raid Nongtung Circle U samla Banjop Maring President KSU North Khasi Hills Eastern Border Area u la ong haba rung kum u dkhot ba pura ngim shym la iohnong shimet hynrei ban shakri ïa ka Ri bad ka Jaidbynriew, hynrei kum ki samla ki dei ban rhem ka mynsiem ban ai ka jingshakri kaba bha tam khamtam shaka thaiñ khappud Block II kaba ju mih ka jingkajia pud ban pynthikna ba ki khasi ba shong ba sah ha katei ka thaiñ kin shongsuk shongsaiñ.
U samla Pynshailang Rani Publicity Secretary haba kren ha katei ka sngi, u la pynpaw ïa ka jingkmen ha kaba u la ioh ban iuhkjat ha Raid Nongtung, kaba dei ka thaiñ khappud kaba ka sorkar mynta ka don ka jingthmu ban pynbeit pud haka wat kaba ar, ha kaba u la ong ruh ba dei ka KSU kaba pahara ïa ka khyndew ka shyiap bad u la ong ruh ba kum ki samla kim dei ban long kum u siej haba la kut ka jingjrong u noh shapoh, hynrei kum ki samla ka Jaidbynriew kiba ieng skhem ban ïaleh pyrshah ïa kita ki jingeh kiba ka Jaidbynriew ka ju kynduh barabor ba kin don ka mynsiem ïaleh haduh ka jingjop ym ban shu iehnoh shiteng por.
Naka liang u President ka KSU NKHD, u samla Ferdynald K.kharkamni u la ai mynsiem ïa ki nongkitkam ba thymmai jong ka Raid Nongtung Circle ba kin long ki samla ki ba iaineh bad ïai trei kam bha shuh shuh ban ai ka jingshakri ïaki paidbah ka Raid Nongtung bad khamtam ba kin don ka jingïatylli khnang ba kin lah ban trei kham bha shuh shuh ha district kumjuh ha ka Raid Nongtung baroh kawei.
Ki nongïalam ba thymmai ka KSU Raid Nongtung Circle ki kynthup ïa u Bah Edmund Shadap kum u President bad u Fleming Sten kum u Secretary bad kiwei kiwei ki nongkitkam ba la pynskhem da u samla Biangbor Paliar vice president KSU CEC ha kaba u la pynkynmaw ruh ïaka nongrim jong ka seng bad na ka liang ka Seng ka pyrshah ïa ka jingwan ka railway ha ka jylla kat naduh kine ki sngi, ki seng ka dang ieng skhem kajuh ka nongrim ban pyrshah ïa ka jingwan lynti rel, bad u la ong ruh bun ki jaka ha nongbah shillong la roi da ki bar jylla kumta u la kyntu ïa ki khun samla ba kin nang trei shitom khamtam ia ka jingwan rung ki bar jylla ba da lei lei ym dei ban ai lad ïa ki .
Ha kane ka sngi la ioh ruh ban pynkup burom ïa u Alloysius Bina u wei na ki nongïalam ba shitrhem Jong ka Raid Nongtung Circle bad la shakri ïa ka KSU u ba la shongthait noh na ka Seng , ka KSU ka kitbok kitwriang ia u ne u Samla Ba un nangïai lah ban shakri ïa ka imlang sahlang ha kano kano ka bynta bad ka kam ba u shakri.
