Nongpoh, Nailar 28: Ka RBYF Mawtnum Unit kala pynpaw ka jingsngewkhia halor ka jingjot jong ki khun samla namar ka jingkyrni haki jingdih buaid khamtam u drok u ba la jyllei ha kylleng ki jaka jong ka Ri Bhoi khamtam ha ka thaiñ Nongpoh kaba ap ruh ka jingma kaba khraw ïaka imlang ka sahlang lada ym lah ban tehlakam bad ban pynduh pyndam ïa u drok.
Haba kren bad u nongthoh khubor, u Samla Peace Maker Makri President ka Mawtnum Unit bad u Samla Alberto Nongsiej Vice President ka Nongpoh Circle kila ong ba kum ka seng ka dap da ka jingsngewkhia ban iohi ba ka jingjyllei u drok kala long kaba shyrkhei bad bun naki khun samla naduh ki shynrang bad kynthei kila sdang ban ngop ha utei u jingdih buaid bad katei ka bih kala sdang ban pur ruh wat sha ki khynnah kiba dang rit bad kiba dang heh dang san kiba dang donkam ka jinghikai bad ka jingïeid.
Kila ong ruh ba dei ka jingjyllei u drok bala pynkharoi ïaki ba bun ki kam sniew haka imlang ka sahlang bad kam long shuh kaba shngaiñ bala mih bad sdang biang ki kam tuh kam thiem bala suba ba kidei ki nongdih drok kiba la shu tuh tang ban ioh pisa ban thied drok, kumba la sakhi ruh ki kam tuh kam thiem wat haki surok bah bad ki naki trok kiba ieng harud surok kiba dang ieng jah thaid, ki dukan bad kumjuh ki iing ki sem.
Halor katei ka jingjyllei jong u drok kaba la buh jingma bad jingbym shngaiñ haka imlang ka sahlang naka liang ka RBYF kala kyrpad ruh ïaka tnad pulit ba kan shimkhia ha kaba ïadei bad ka jingjyllei jong ki nongdih bad nongkhaii drok, khamtam ban ïaid pahara haki jaka ba suba bad naka liang ka seng kan ai ruh ka jingïatreilang bad ka tnad pulit naka bynta ban rat diengkhong ïa u drok.
Hakajuh ka por naka liang ka seng kala maham ruh ïaki dukan ba kim dei ban die ïaki biri, sikret bad kiwei kiwei ki jingbam kiba ktah ïaka koit ka khiah sha ki heprit bad ki khynnah skul, bad lada lap naka liang ka seng kan sa leh da kab tyngeh, kila bynrap.
