Shillong, Naiwieng 14: U Symbud Myntri Rangbah ka jylla, u Bah Sniawbhalang Dhar, u la pynshlut ïa ki Khynnah skul ba ki dei ban ieit ïa ka Politics ne ka saiñhima sima bad kim dei satia ban lehraiñ ne isih ïa ka.
Ïa kane u Bah Sniawbhalang u la pynpaw haba kren kum u Kongsan ha ka jingrakhe dap 32 snem ka skul St. George Secondary School Nongmensong, ha kaba la rakhe ruh artad ïa ka Children’s Day, kaba dei ka sngi kha jong u Pandit Jawaharlal Nehru, u Myntri Rangbah Duh ba nyngkong eh jong ka ri India.
U la ong ruh ba kum ki Politician teng teng ki hap leh myn leh hakhmat ki paidbah, ha kaba wat hapdeng ka jingsngewsih ruh hap ban pynpaw ïa ka khmat kaba phuh samrkhie. U la ong ba ki Khynnah skul ki dei ban trei shitom khnang ba lashai la shisngi, kin long ki nongïalam jong ka jylla bad kumjuh ruh jong ka ri India.
Ha kaba ïadei bad ka jingrakhe ka skul St. George ïa ka jinglyngkhuh snem ba 32 jong ka lane ka Foundation Day, u Symbud Myntri Rangbah, uba long ruh u nongshong shnong jong ka Nongmensong, u la ong ba u sngewsarong ba kane ka skul ka la nang kiew shaphrang katba nang mih ki snem, wat lada ka jingheh lane ka phyllaw jong ka, kam dei satia ka skul kaba heh. Pynban kane ka skul ka la pynmih shibun ki khynnah skul kiba la wan shakhmat ha ki eksam jong ka MBoSE, ha kaba la don ruh kiba wan ha ka top 20 ha ki eksam jong ka SSLC bad kumjuh ruh ki khynnah skul kiba ïoh 100 na ka 100 ïa ka Mathematcs.
“Kam dei kaba suk ban ïoh ïa ka subject jingkheiñ ne Mathematics 100 na ka 100”, la ong u Bah Dhar.
U la ai ka jingïaroh ïa kane ka skul bad kitbok ba kan nang kiew shaphrang ha ki snem ban wan, wat lada ka dei ka skul ka bym pat da paw eh haduh katta katta kum kiwei pat ki skul ha nongbah Shillong.
U la ai khublei kyrpang ïa u Principal, ïa ki Nonghikai, ki khynnah skul bad kumjuh ruh ïa ka shnong kiba la ïatreilag ban pynlong ïa kane ka skul kaba pawnam.
